Jowai: Kiwa chong chnong yong ka Namdong–A, West Jaiñtia Hills District da pynsñiaw ki yei pyrchah joor yei wym mano ka tnat bordiñ ya ki bru kiwa chong wa sah cha ki thaiñ nongkyndong heiwa ka chnong Namdong da sñiaw ki wa da chah pyndooh ki yei hok yong ki heiwa da dooh bordiñ ki nadooh ka 19 tarik Duyatra (Jan) 2018 heiwa ya ka bai bordiñ waroh da dep su.
Ka chnong da dep pyntip ko ha ka 21 tarik u Duyatra 2018 ha u SDO wei hadooh kini ki sngi katwa yachem wa ki da jubab ki wa ym em Transformer ki.
U waheh chnong ka Namdong-A da ong u wa ini da man i dai sarom ya ka MeECL heiwa kattu la soo bnai tam ym yoh Transformer ki wow pynbiang ya iwa emkaam ki paidbah, neibhah waroh kiwa pynemkaam ya uni u Transformer kamwa 99% toh kiwa dadep su ya ka bai bordiñ lait noh kawi ka yung kawa da chah ah bordiñ nachwa.
“Ini pynyoo ko yei wym kheiñkor ki sahep kiwa toh u pait ya kani ka kaam khamtam ya i kiwa sah cha nongkyndong hanalada dep pyntip cha ki wei da phone leh man ka tayaw ym leh ki iyi iyi leh,” da ong u waheh chnong.
Kamtæ neiliang kiwa yahkhmat ka chnong da pynman ki da ka Dorbar Chnong ha kani ka 22 tarik kawa da wan chimbynta da ki paidbah kynthai wa chynrang wei da chim ya ka rai wa ym su ya ka bai bordiñ lada ka MeECL ym pynyoh ko da uwi u Transformer hapoh kani ka tayaw wei daw lai ujor ko leh yei kheiñ bai bordiñ kulmar yong kani ka yungkrehkam ya ki paidbah hadooh u bnai wa le hanlada dep pyntip nadooh ka 21 tarik Duyatra 2018 ha u SDO lyngba i thoh hajrong i sih uni u Transformer.
Ini i wym chimkhia ka MeECL da ktah ko leh ya i puræ puthi ki khynnah skur kiwa da jan poi ka Exam.
Discussion about this post