Ka Angela Rangad kawa man leh ka dkhot ka TUR, ynne ka sngi da lai chong kyllaiñ mynngor ko samen samen hakhmat ka yung krehkaam Secretariat, Shillong yow dawa na ka sorkar Meghalaya wow su noh smat ya ka poisa wa dang sah cha kiwa mylla sngi kawa da kular wow e nadooh i por wa em ka Lockdown nadooh u snem 2020.
Hanla joor u slap leh, ka Angela da chong ko ha iwi i kdong deiwa ksoh lang wa ki kot wa dawa naka sorkar yow e yei hok ki paidbah.
Ka Angela da ong ko wa da hap wow leh ya ini neidaw wa ka sorkar ym sñiawthooh ko yei chitom ki paidbah khamtam wym e yeiwa da kular wow su cha kiwa khih mylla kiwa da em hadooh katni ki wym pu em yoh ya kani ka poisa.
Da ong ko leh wa i wan ka la-ær wa ar ka khlam da ktah chooh chooh ko ya ki paidbah iwa da ban sa ka sorkar ka wym em e ya ka poisa.
Da maham ko leh ya ka sorkar wa ini toh iwa sdang hi-eh wei daw pynman leh ya ka lai paidbah yow pynkynmoo ya ka sorkar.
Ini i leh ka Angela da pynkhyrngiat ko ya ki bor ka aiñ kiwa da khang ya ka Gate hadien wa ka Angela ym bien ko wow khih na ini i thaw.
Kam wow pynknymoo wa ynnin u snem ka sorkar da pynbna ko wow e yarap poisa T. 2100 cha kiwa khih mylla, kiwa kamai kari, kiwa chongdai, kiwa kreh kaam yung kam chibynta ka Chief Minister’s Relief Against Wage Loss (CMRAWL).
Heiyatoh wa ini da booddien da ka RTI heiwa da chem wa boon kiwa da toh hok u yoh ym em yoh ki T. 700 leh.
Ka Angela da ong ko wa daw wan ko man-ka-sngi ha ini i thaw ha ki kynta wa mankreh yow dawa wow pynlait ka sorkar wut wut ya ka poisa.
