Hadien wa da kut noh ki 5 sngi wa da e por ya u Montri Rangbah, neiliang u MLA ka North Shillong, u Adelbert Nongrum ynne ka 17 tarik da pynman u yei pyrchah wa jai-jai yei wym ye ka sorkar wow leh iyi iyi ya ki 5 tylli ki phang wa da dawa wow pynkrehkaam hachwa wow lehkmen yei dap 50 snem ka jylla.
Ya ini i pyrchah, u Adelbert da pynman deiwa chong kylleiñmyngngor ha Madan Malki kawa da sdang nadooh 4 waje ynne i janmiet wei daw pynkut hadooh ka 22 tarik uni u bnai heipor 10 waje i step. Ha kani ka sngi sdang wow pynyoo yei pyrchah yaka sorkar da synraan lang ya u Adelbert da ka kurim u, ka Pamela Wahlang wa kattu katni ngut kiwa yahkhmat ka Khun Hynniewtrep National Awakening Movement (KHNAM).
Hawa klam wa ki laad pathai khubor, u Adelbert da kylli u lada chong hok wow lehkmen yei dap 50 snem hawa ka jylla ym em ko iyi iyi? Da ong u wa u chong wow pyrchah kam i dak wym chimbynta ha ka lehkmen 50 snem wot hadooh wow yoh yei dawa wei pynrap u wa kini ki dawa wa da booh toh kiwa ye wow leh da ka sorkar jylla.
Ki 5 tylli ki dawa wa u MLA uwa man leh u President ka KHNAM da booh u hakhmat u Montri Rangbah kynthup ki wa ka sorkar toh u bichaar ko wow chimkhia biang ya i bhah thung kreh neibhah da neh kamjooh kattu la 50 snem, i pynheh yei rta yaleh kreh cha ka 37 snem. Kawi won ka phang toh wa ka sorkar toh u chim ko yei rai wei em noh ko da ki yong ka hi ki IAS, IPS, IFS neibhah kamwa man katni kini ki sahep sorkar da booh lang ki hapoh ka Assam-Meghalaya Cadre iwa da booh i eh hei ya krehkaam khamtam hawa yaklam pynbait ya u pood u ang wa ka jylla Assam.
Chooh chooh u Adelbert da ong u wa ka sorkar da toh u pyndep noh yei kular wow kyrriah ya ki bru kiwa sah ha Them Metor deiwa bood ya ki kyndon aiñ wa ya kiwa sah pyrchah aiñ leh toh u kyrriah katkam ka aiñ.
Hawa yatoh wa i pynbait pood wa ka jylla Assam, da ong u wa toh u burom markylliang ya ka Status Quo, weiwa ka sorkar jylla katwa ym pu ye wow pynbait ya u pood u ang ym toh wow chna ya ki Police Outpost neibynta i chngaaiñ kiwa chong chnong ha khappood.
