Ka seiñ All Jaiñtia Youth Welfare Organisation, East Jaiñtia Zone, da beiñ joor ko yei chah tynyap khiar sa kawi ka khynnah skur, ka (T) Ebamon Siangshai, kawa dang puræ Class X ha Wapungskur Higher Secondary School, Wapung, kawa na ka chnong Pamrakmai, East Jaiñtia Hills, ha ki damok kwah snaam dang ha kini ki kajiak sngi wa dadep, heiwa ya i metyap yong ka da chem na iwi i khloo ha Ar Kilo, Dkhiah East, East Jaiñtia Hills ha ka 13 tarik yong uni u bnai.
Ka AJYWO East Jaiñtia Zone ha ryngkat i sñiawsih wa joor bha, da beiñ joor ko hadooh kattæ kattæ ya ki damok kwah snaam, ki wym em de i sñiaw wyrai wot ya ka khynnah skur wapli, kawa dang khooid dang chida, kawa dang 16 snem i rta, heiwa da pyntkut yabor ya i mynsien yong ka.
“Ka seiñ da pynsñiaw ko ya i sñiawkhia iwa joor hadooh kattæ kattæ hajrong i wym em de i sñiaw chngaaiñ ya i lai i wan yong ki khynnah skur kynthai ha kini ki sngi kiwa katni ha East Jaiñtia Hills. Ini i man i long iwa kamni da ktah joor bha i hadooh kattæ kattæ ya i sñiaw yong ki khynnah skur wei kamjooh leh yong kawi pa kawi ka manyung mansem, ha East Jaiñtia Hills,” da ong u Heatermoon Ryngkhlem, President yong ka AJYWO East Jaiñtia Zone.
Dang ha kini hiwot ki kajiak bnai wa da dep, ynnin snem, iwa kam ini i jooh i jia wa sñiaw chyrkhei da jia i ha ki thaaiñ Sohkymphor, East Jaiñtia Hills, ya kawi ka khynnah skur wapli, kawa dang puræ Class IX, ha ka skur Tia Chaphrang Higher Secondary School, Sohkymphor.
“Lada kamni bait ini i jia wa chyrkhei u pteiñ i wow jia neini chakhmat, kammon u man ki payu para kynthai wapli yong i neini chakhmat? da kylli u Heatermoon.
Ka AJYWO da kyntu joor ko ya ki bor yong ka aiñ, heiwa u kreh chitom bha ki wow thooh hadooh wa chem wei u kem ya kitai ki damok.
