Ynne ka sngi, ka Seiñraij Muthlong da pyndep ko yaka lehñiam chaad Behdieñklam wa chisien chisnem yong ka ha Biar Nohrong Thadmuthlong, West Jaiñtia Hills District deiwa ya chimbynta chongchit lang ki khon ka Ñiamtre na ki Raij waphær waphær.
Kani ka chaad ñiam Behdeiñklam toh kawa da pynjooh wei pyndep khlieh-u-snem da ki bru Pnar kiwa dang man Ñiamtre wei ka yurim yong ka hi toh u beh yaka khlam, ka diat, i kjut chitom wa ki sih wa boonjait haka imlang sahlang.
Ha kani ka Behdeiñklam najrong kiwa yahkhmat ñiam naki Raij ki Elaka waphær, da wan sakhi leh da u Comingone Ymbon, Montri sorkar kam u kongsan katwa u BDO Laskeiñ C&RD Block, u B. Niang da man u kam u symbood kongsan.
Deilang ki rot ki rong wada pynpoi hapoh Biar Nohrong Thadmuthlong, ki khon ka Raij da wanrah haroh ki ka khubor cha u paidbah hajrong i chah kdoh mroo ki bru ha ki Mobile Phone wa kiwi ki de ki Wyrta wa emkaam.
U kongsan hawa e yei klam da e khublei Behdeiñklam u ya ki khon ka Raij Muthlong kamjooh ya waroh kiwa wan sakhi wan chimbynta. Wei hawa kyruiñ won u chaka rym-aw kyntu u yaki khon ka Raij Muthlong wow thung yaki deiñ ki seij ha soodong ka Biar Nohrong, neibhah deiwa em ki dieñ yarap ko chiboon yaka rym-aw haki rukom waphær waphær.
Ong haroh u wym em da kawi won ka laad u pynneh pynsah yaka rym-aw lait naki dieñ ki seij, wei e nongmuna haroh u yaki um ki wah kiwa da nang khian nang wiar neipor cheipor wei i daw toh wa da duna ki dieñ.
Discussion about this post