Jowai : Ka lehkmen dap 50 snem namo ka Golden Jubilee Celebration ka Kiang Nangbah Government College ka wow pteiñ chi snem lynter da sdang ya ka ynne ka sngi ha ka madan ka college heiwa ka phang yong ka toh “Dream, Believe, Achieve.”
Chwa wow tip ya ka college kam ka Kiang Nangbah Government College da sdang ya ka kam ka Night College ya kiwa ym yoh poisa u lai puræ cha Shillong, tangwa kat ya ka exam hap kiwa puræ u lai yaleh cha Shillong wei heitu i por kiwa lai puræ toh kiwa da em khon em kti lut.
Ha ka 15 tarik u Naikhynde ha u snem 1967 da wai ya ka kam ka college wa paka heiwa u ma Drinkson Challam da man u kam u Principal wa nyngkong ka college wei da tip ya ka kam ka Jowai Government College wei da sdang chwa ya ka course Pre University heiwa da em 6 ngut kiwa wan puræ wa ka BA 1st year kiwa da em 12 ngut wei da tipmit ya ka da ka Guwahati University.
Ha u snem 1967 da pynman class ya ka ha ki yung wai wei ha u snem 1968 da kyrriah ya ka ha Iongpiah ha i yung San Mala.
Ha u snem 1971 ha u Naisaphra August ka college da sdang won ko sa ka Morning Shift wei da pyndam ya ka Night Shift neidaw wa boon kiwa puræ toh kiwa da em kreh.
Ha ka 30 tarik u Kmaichonglad (December) ha u snem 1983 da pynkylla pyrtuid ya ka cha Kiang Nangbah Government College wei chong ko katni ha i thaw wa heh 33 Acre.
Katni ka college em ko 17 tylli ki Department wa 130 ngut kiwa sikai wei da em leh 4,139 kiwa puræ ha kani ka college.
Ya kani ka Golden Jubilee da wan wai da u Dr. R.C. Laloo, Deputy Chief Minister hei emlang u Ram Singh, Director of Higher & Technical Education da khut sñiawbha leh nadooh ki Principal warim, ki lecturer kamjooh wa ki khynnah wa dep puræ na kani ka college.
U Dr. R.C. Laloo hei klam yong oo ong u wa oo da emlang u wa kani ka collge nadooh u snem 1973 kam u wa lai puræ hadooh wa man u leh kam u wa sikai ha ka. Ong u leh jooh chimbynta chongchit u ha ka Student Union wei da dep man u leh kam u General Secretary ka Jowai Government College Students Union. Kamtæ dap u dei mynsien wa kmen yow emlang ha kani ka sngi.
U Ram Singh ong u wa ha ka pyrthai wa katni emkaam u lai katkam i por nadooh ki laiñ wa puræ wa i rukom sikai wei ymhoi u chah ieh i ha ka pyrthai.
Yow pynphooh pynphieñ ya kani ka sngi ki khynnah kamjooh ki wa sikai da chimbynta ki ha ki chaad, ki rwai wa ki pynyoo riam (Fancy dress) iwa da pyn ka-it ya waroh wa emlang ha kani ka sngi.
Discussion about this post