Jowai: Ka lehkmen wow pdiang ya u snem thymme 2019 ha chnong Jowai man ko kawa phær chwa wei kawa pawnaam heiwa kamwa 18 tylli ki Dorbar Chnong wa ki dong da chimbynta lang ki wow pyntam kawi ya kawi khamtam wa da em ka yakob wa pynman ka Jaiñtia Tourism & Environment Society (JTES) wow e khusnam cha kiwa lehkmen kawa phooh wa pheiñ wa chongchit dooh.
Ka lehkmen da sdang chwa ko da i baamdoh kutsnem wei hadien ini da mih paidbah jar jiar ki dorbar chnong wa ki dong deilang wa ki rwai pdiang ya u snem thymme kamjooh wow sñiawngooh ya u snem wa warim, heiwa em kiwa da chna ya ki sur wa thymme kamjooh leh ym em mylliñ ya ki sur warim.
Ha uni u snem da man ka lai chaad kawa kyllooid hadien wa u SP ka WJH wa i kreh chitom ki Pulit ka Jowai Traffic Police da khang ki wow bood ki kari samen ya kiwa lai chaad wei ha Iawmusiang nadooh ka 4 waje i janmiet hadooh 9 waje i miet ym em chah wow psiah kari.
Kamtæ ye wow ong wa ha uni u snem kiwa chimbynta da rap boon ki tangwa da ktah ko ya kiwa lai uiñke suwari kam cha kchaaid Krangsuri kiwa wan da ki Bus kiwa ym yoh laad wow liwan neibhah ka sarok Bypass na Riatsasim ym lait u lai ki kari wa heh kam ki Bus wei kiwa sah kut da em leh kiwa wan na baar jylla.
Hanlada kattæ da man ko ka lehkmen kawa heh bha ha Jowai bar ya kiwa da sakhi ha ki snem wa da dep.
Discussion about this post