Ka yang miet wow pdiang ya u snem 2023 ha Jowai da man ko kawa chongchit ha ki dong ki chnat ka chnong heiwa da pynman ya jar jiar ki yalang wow lehkmen nadooh ki thnang Bonfire, i lai chaad , ki pynyoo sap chaad, sap rwai kiwa da sdang nadooh 7 waje i miet.
Ki khon khynroo khyllood, ki khynnah kamjooh ki waheh da mih ki dei mynsien wa kmen wow e khublei leh ya u snem warim kamjooh wow pyn-ehbok, pyn-ehnasib chi lok chi jor, ki chi yung chi sem wa u snem thymme u wanrah u ya chiboon ki bha ki miat.
Heipor pyrdi synyaaw da em i thang ya ki bomkala, ki pcher-pcher, ki slap, ki rocket iwa da pynthaba wei pynche ya ka miet.
Da em leh ki dong kiwa da pynkut ya ka tayaw lehkmen heiwa da pynman ya kiwa boon ki jait yakob, nadooh ki Quiz, ki yakob dro wa kiwi kiwi de kam chibynta hi leh wow pynkut ya u snem.
Ha Chutwakhu hei step ka 31 tarik da pynman ya ka yakob Slow Bicycle Race wa ka yakob pynhær phok.
Ha uni u snem ya ka baamdoh yong chnong ha Jowai da rah cha ka 2 tarik kamjooh ka lai chaad kut snem heiwa daw wan wow sakhi lang da u Montri Rangbah ka jylla, u Conrad Sangma.
