Ka Yadaw Masi Rong ka Elaka Raliang, toh ka yachemlang ki khon ki raiot ka Elaka chisien chisnem ha madan Pamsna Laskeiñ, West Jaiñtia Hills District wa da sikai wei pynjooh nadooh ki warim nachwa hadien wa dep thung symbe ha ki pynthor ki hali wei ha uni u snem leh da pyndep ya kani ka lehkmen haka 29 tarik hapoh i pait i pynlai ka Raliang Elaka Arts & Cultural Organisation.
Katkam i sikai ki waheh wasian nachwa, kani ka tamasa toh yow wanrah i yatylli, i ya tipmit kylliang hapyrdi ki paaid ka Elaka wa wan naki chong waphær waphær.
Hei yaklam wa u Dolloi ka Elaka Raliang, u C. Lyngdoh da khana u wa nachwa ha kani ka tamasa Yadaw Masi Rong da em du i yadaw masi donhi waka yaaw ya dai ya thied wa boonjait harood madan, tangwa kat nang lai ki por da nang pynpsiah chooh chooh ki jait pynwyrngai katkam wa yah ka juk deiwa pynman ki yakob waphær waphær kam i chaad tynre, yataan tylle, i yakob phet, yaknieh chuki wa kiwi najrong wa pynkup burom leh yaki khon khynroo khyllood wa lai puræ wa poi chakhmat haki kyrdan puræ waphær waphær.
Khana u wa nachwa kani ka tamasa heh bha ko neidaw wa ki paaid ka Elaka leh dang boon kiwa ri masi kyrtong, wei da wanpoi kiwa boon wa yabeh wow wanrah ya ki masi yong ki. Tang ha kini ki sngi won neidaw wa da duna masi da hap pynpsiah da kiwi ki kaam yow pynwyrngia ya ki paaid ka Elaka.
Heijooh i por kyntu haroh u yaki paaid ka Elaka wow yakrehlang ki neibynta u pynneh pynsah yaki riti dustur wa da sikai ki waheh wasian itæ toh dei wow wan chimbynta wei kyrchaan ya kani ka tamasa man-u-snem.
Heipor step yong kani ka sngi chwa u sdang ka tamasa da em leh ka suit ka choor ka ngooh ka dem waka yalang tbian wa da emlang nadooh ki waheh chnong waphær ka Elaka, ki bru mihkhmat katwa u BDO ka Laskeiñ C&RD Block, u B. Niang da man u kam u kongsan.
U kongsan hawa klam ha kani ka sngi da kyntu u yaki bei ki pa wow wan yah yaki khon cha kam kani ka tamasa khnang yow tip ki yei sikai tynre, wei wow embynta haka imlang sahlang leh man ko kawa emkaam ha kini ki sngi khamtam ki khynroo khyllood wym pynlut por du hei puræ kot.
Da kyntu haroh u yaki paaid ka Elaka wow nang kyntu kynrong chooh chooh ya kani ka tamasa tynre khnang wa wot ki bru wa na baar leh u kwah ki u wan sakhi.
Ha kani ka sngi najrong ki jait yakob waphær waphær kam i yadaw masi, i taan tylle, ka phet niangsiang, yaknieh chuki wa kiwi, da e khusnaam leh cha ki 4 ngut ki khynroo khyllood wa puræ ka Elaka wada poi chakhmat haka SSLC, HSSLC yong ka Arts, Commerce waka Science Stream.
Discussion about this post