Ka yachemlang ki khon na Ri-loom Khasi wa Jaiñtia wa lai puræ wei wa lai kreh ha Guwahati wa da pynman ha ka 24 tarik uni u bnai da man ko kawa chongchit deiwa wan sakhi lang ki kynrem ki lyndang napoh ka jylla wa kynthup ya u Kyrmen Shylla, MLA ka Khliehriat uwa man leh u Montri wa pait yaka chnat Social Welfare, u Eugeneson Lyngdoh, MLA Mawphlang Constituency, u Bajop Pyngrope, MDC Rymbrai Jyrngam, u S. Pasleiñ, DSP Ri-Bhoi District, u Dr. Brightstar Langbang, BDO Thadlaskeiñ Block, neitæ da emlang leh u Treibor R Suchen, General Secretary JSU Central Body, u Commander Shangpliang, President ka Meghalaya Film Makers Association (MeFilMA) wa kiwi kiwi.
Ya kani ka yachemlang da pynman da ka Khasi Jaiñtia Students Union Guwahati, wei kawa da jooh leh khlieh u snem lait noh ha ki 2 snem wa em ka Lockdown.
U Eugeneson hawa e yei klam, ong u kam ki khynroo toh u em ki i yooluti yaka thong wada angnood ki u poi hanla hap lai luti chiboon i eh i khoo, wei kyntu u leh wow yait nei pynchoi wa thmu pynngop neibhah ye ko u yah luti bakla yaka mynried.
U Kyrmen Shylla won hawa e khublei ya waroh kiwa embynta lang ha kani ka lehkmen, ong u em i heini kam chi lok yow pyrchang yarap yei emkaam yong phi katwa ye i bor, han lym toh kamwa yooluti. Neitæ da ban joor u leh hajrong i emkaam wow yakrehlang khnang yow poi cha ka thong.
Neiliang u Bajop Pyngrope kyntu u wa hawa em cha baar toh u em i bahkhlieh wa khroo neibhah ki bei ki pa kreh chitom bha ki yow pynyoh yei stat i tip kamjooh leh u rah naam rah burom ki ha kawon kawon ka laad wa lai puræ.
Da pynrap haroh u wa ka jylla yong i toh kawa boon bha ki seiñbhalang tangwa duna i yatylli, wei ki jaitbru yong i leh yatylli ki du hawa em chabaar tangwa manda poi ki cha jar jiar ki chnong won yapiah ya pra ki. Kamtæ yooluti u wa kam kani ka yalang u pynyoo nongmuna ko wow em i yatylli chaphrang.
Ha kani ka sngi da em leh i e khusnaam wa tip kam ka Maitchaphrang Award yaki khynnah wa da pyndep bha ya ki Exam waphær, kamjooh leh da saam ya ka Appreciation Award cha kiwa sikai wa kiwa kreh heiyatoh wa i chait i khiah.
Chwa ini da yoh i klam pdiang burom na u Galio Langki Suchiang, President Khasi Jaiñtia Students Union Guwahati, da yoh i chaad i rwai na ki khynroo khyllood katwa yei kyntien e khublei da yoh na ka Glorify Lamurong, Asst GS ka Union.
