Ha ka 7 tarik uni u bnai, ka Tome Memorial Secondary School Mooralong Jowai, da pynman ko yei yachemlang yong kiwa jooh lai puræ ha kani ka skur namo ka Reunion kam chibynta u wanrah biang i yajan hadien boon ki por ki snem wada mih ki na kani ka skur.
Ha ka kani ka yalang yachemlang wa pynlai da u Manmi Laloo, da yoh i duwai naka Sr. Philicita Toppo MSMHC, i klam pdiang naka Sr. Teresa Paite MSMHS Headmistress, i klam naki Past Pupil namo ki khynnah skur warim kani ka skur wa kynthup yaka Wenty Bareh, ka Clementina Bareh, u Trevorshefield Phawa, i klam naka Celestina Tyngkan wa kiwi.
U Rev Fr. George Shining Lyngkhoi SDB, Principal ka Don Bosco College, Byndihati kam u bru chemphang yong kani ka sngi hawa e yei klam da ban joor u hajrong i kordor wow man ki bru wa kmen hawa im.
Ong u boonsien hi ha pyrthai ki bru rap yaklam ki hajrong ka poisa, ka naam ka burom, tangwa hawa kut hi i lai luti yong i im, sñiawthooh ki wa du i yoh donhi yei rukom im wa sñiawhun sñiawsuk katæ toh kawa pynkmen tam yow bru wei kawa pynchait pynkhlan.
Neitæ i ya embynta haka imlang sahlang man i kawa miat, i sñiawhun sñiawsuk hajrong i emyatoh la ha yung ha sem, waki lok ki jor leh man kawa bha.
Kamjooh i emyatoh wa miat wa bha yarap kær wei da ko ym du yei rynyieñ tangwa wot yei bor pyrkhat kamjooh.
Kamtæ ngait u wa kani ka yachemlang ha kani ka sngi leh man ko chibynta wow pynyajan biang yeitæ i emyatoh hapyrdi iwi yei wi kiwa da pyndep yei puræ na kani ka skur.
Da pynkut u deiwa ong, “Man ki bru wa im slem wei kiwa dap dei kmen mynsien hawa im.”
Da pynchongchit leh ya kani ka sngi da i rwai i chaad naki khynnah kiwa dang puræ ha kani ka skur.
Discussion about this post