Jowai: Ynne ka sngi ka yung krehkaam u Deputy Commissioner ka West Jaiñtia Hills da khut pynman ko ya ka yalang ha Enowel Hall, Amlarem wow pynsñiaw yei thmu ka sorkar wow sdang wai biang ya i khayi hapyrdi ka India wa ka Bangladesh lyngba ka Land Customs Station, Tamabil, Dawki.
Da wan chimbynta ha kani ka yalang da u SP ka District, u Bikram D Marak, u SDPO ka Sub Division, u Donkupar Moksha, wei ya ka yalang da pynlai da ka SDO ka Amlarem Sub Division, ka JU Kharpuri.
Ha kani ka yalang da wan chimbynta da ki bru kam ki seiñ ki Exporter, ka seiñ ki waheh chnong, kiwa kitkaam chnong, ki seiñbhalang kam ka JSU, HYC, wa kiwi kiwi.
Ka yalang ynne da man ko kawa chongchit heiwa da sakhi ya ki ar liang wa pynchong ki ya ki yurim wow kyrchaan wei wa pyrchah yei thmu ka sorkar.
Neiliang kiwa kyrchaan ya ini i thmu wow wai biang ya i khayi da pynsñiaw ki yei mynsien wa sñiawkhia neibhah nadooh wa khang ya i khayi da ktah bha ko ya ki ha kiwa boon ki liang.
Da ong ki leh wa da chah ktah chiboon i khih i kreh kiwa imja lyngba i khayi wa ka Bangladesh nadooh kiwa yah truck wa khamtam kiwa khih mylla neibhah ki emkaam wow pyndap ki ya ka yung ka sem yong ki.
Heijooh i por kiwa khayi da pynsñiaw ki leh ya ki kyntien kular wow bood ki thij ya ki kyndon wa da booh ka sorkar lyngba ka chnat i chait i khiah khamtam ya ki Standard Operating Procedure (SOP) khnang wow yada na u COVID-19.
Neiliang kiwa pyrchah da yieñ skem ki hajrong ka yurim wow khang bait chooh ya i khayi wa ka Bangladesh lyngba kani ka thaw neibhah kiwa yoh COVID-9 ha Bangladesh dang ku i katwa dang mih ki sngi.
Da ong ki wa ka sorkar toh u pyrkhat bha ko yeini neibhah wa em boon ki chnong wa em ha khappood wei lada jia wa em wa yoh khñiang COVID-19 daw ktah ko ya i rukom im ki bru man ka sngi, katwa kamtæ da kyntu ki ya ka sorkar wow pynsangeh chwa yeini i thmu yong ka.
U SP hawa klam da ong u wa manda sdang biang yei khayi neiliang ki bor pulit daw kreh ki wow pynsuk yei lai i wan ki kari khamtam wow lait nei sahkut ki kari ha tymbud ki sarok deiwa kyntu leh ya ki bor chnong wow embynta ki hei wo pynlai ya ki kari.
U DC ka District, u Garod LNS Dykes da ong u wa ya ini iwa pynsñiaw ha kani ka yalang daw phah cha ka sorkar wow leh ko yeiwa emkaam deiwa pyntip leh wa i khayi wa ka Bangladesh lyngba kiwi ki thaw da sdang biang i.
Chooh chooh da pyntip u ha ka yalang wa lada chem wa tyngkheiñ namo ym em u bood ya ki kyndon namo ka SOP heipor wa khayi neiliang ki bor district daw khang noh ki ya i khayi lyngba kani ka thaw.
Da pyntip u leh wa u wai ya i khayi wa ka Bangladesh daw wai hadien ka tayaw wa man ka Behdieñkhlam.
