Ka yalang wa pynman da u Sniawbhalang Dhar hei miet ka 1 tarik uni u bnai ha Moodymmai da man ko kawa chongchit heiwa da wan wow psiah lang ki bru ka Congress yow kyrchaan noh ya u Sniawbhalang.
Ha kani ka yalang da emlang leh u MDC ka Ummulong-Moodymmai Constituency, u Jesse Suiam.
Neiliang u Sniawbhalang uwa man kam u MLA ka thaaiñ kamjooh u Montri sorkar da e khublei u ya kiwa kyrchaan yong oo wa da kreh chitom ki u pynwan dur ya ka chong ka thaw hei chongsuk chongsaaiñ ha kitu ki por wa da lai ha i por Election 2018 wa da mih i awri awra hapyrdi ki ar Party wei da man ka chnong kawa da em arliang.
Kamtæ da e khublei u ya ka EC ka chnong yei stat ki wow pynlai wei i stat ki heh chnong wa da ye u pynlang pynlum ya ka chnong kawa da yatylli biang.
Da sneiñ u leh ya waroh kiwa yahkhmat wym toh de u em i sñiaw yaphær hapyrdi ki warim wa kiwa thymme. Da ong chooh chooh u wa i kam ki bru wa Tip Bru Tip Blai ym hoi u e laad i wow synchaar da i adnood wa i bichni hawa im i khnang wa ka mynried yong i u man ko kawa tyrchiah.
Da ong u leh wa kattu da kup hapoh ka jooh ka satri yong ka NPP kamtæ da kyrpaad ya kiwa yahkhmat warim wow pdiang ki ya kiwa yahkhmat ka Congress deiwa khooid mynsien khnang wa ki leh u yoh mynsien ki u nang toor chakhmat.
