Ka Trained Nurse Association of India (TNAI), East Jaiñtia Hills District Unit, da pynman ko yei lehkmen ya ka sngi kyrpang ki Nurse wa em hapoh ka District ha ka 12 tarik uni u bnai yow kynmoo warom leh ya ka sngikha ka Florence Nightingale kawa man kam kawa pynkylla dur yei rukom kreh ki Nurse kawa da tip leh kam ka International Nurses Day 2025.
Ha kani ka sngi da wan sakhilang da u Kyrmen Shylla, Montri sorkar kam u kongsan, u Lasky Rymbai, Dy. CEM JHADC kam u symbood kongsan ryngkat i emlang u District Medical & Health Officer, u Dr. D. Shylla, ka Dr. R. Suchiang wa Dr. G. Chyrmang, ki Doctor yong ka Pamrapaithlu PHC, Dr. G. Sungoh, ki waheh chnong, kiwa kitkaam ka TNAI, EJH Unit wa kiwi kiwi kiwa da chah khut sñiawbha.
Ha ka yalang wa da pynlai da ki Staff Nurse ka Pamrapaithlu PHC, da sdang da ki kyntien pdiang burom na u Mihsalan Dkhar, uwa man kam u Secretary TNAI, EJHD Unit, kamjooh yei kyntien ngooh Blai na ka Sr. Wianda Talang, ANM Tuber Sub-Centre, chirup wa i rwai yei sur Anthem da ki Staff Nurse yong ka Pamrapaithlu PHC wei pynbood sa i thang mombati wei i chim ya ka Nurses’ Pledge.
Ya ka phang pyrdi namo ka Theme yong uni u snem da klam da ka Jenny Mary Dkhar, President TNAI, EJHD Unit hajrong “Our Nurses Our Future, Caring for Nurses Strengthens Economies” wei da pynbood yei ah Cake kam ka dak i kmen ha kani ka sngi.
Neiliang ka TNAI, EJHD Unit da pynkup burom ko ya ka Kerlang Sutnga, ANM Dkhiah Sub-Centre wa ya ka Shaimon Mukhim, LHV ka Lumshnong PHC kiwa da chongngiah na ki kaam chakri yong ki.
U kongsan hawa e yei klam yong oo da e u i yaroh wei sñiawngooh ya ki Nurse waroh wa da man ki kam ki budloom yong i chait i khiah hapoh ka District wa ka jylla kiwa kreh chitom met wa mynsien u e yei chakri wei sumaar sukhær cha kiwa kjut wa chitom wa emkaam yei chait i nang nei yarap yong ki.
Da kitbok kitrwiang wei da kyntu u leh u nang pteiñ ki yei kaam chakri wa bha yong ki katwa nang mih ki por ki sngi hanlada hap maad chiboon i eh i tynjooh hei im yong ki.
Ha kani ka sngi da yoh leh yei klam na u symbood kongsan, ki Doctor wa kiwi de wei yei kyntien sñiawngooh da yoh na ka Sr. Daroiki Dkhar- Staff Nurse Pamrapaithlu PHC.
Hadien wa wai u kongsan ya kani ka lehkmen, heipor janmiet won ki Nurse na waroh ki thaw sumaar hapoh ka District da lehkmen leh sñiawbha ki ha ka sngi kyrpang yong ki deiwa ya chaad ya rwai lang.
Discussion about this post