Ka Seiñ Khynroo Parish Nangbah da pynman ko ya ka 4th Annual Youth Convention ha ka 10 hadooh ka 12 tarik uni u bnai hapoh ka Parish Nangbah, heiwa neiliang u President yong ka seiñ, u Eugine Hinge da e u ya ki kyntien pdiang sñiawbha ya waroh kiwa wan cha kani ka Convention deiwa pyntip wa ini toh i sien wa nyngkong wa da pynman ya kani ka Convention hapoh ka Parish neibhah wa da jooh pynman cha kiwi ki Balang chnong kiwa em hapoh ka Parish.
Ha kini ki sngi da wan boon ngut kiwa klam nadooh ka People’s Welfare Development & Society wa kynthup ya u Mutshwa Thabah, ka President yong ka ICYM Jowai Diocese ka Sr. Mabel Dhar wa u Fr. Ebormitre Lamare uwa man u Spiritual Director yong ka seiñ khynroo ka Parish Mynsngat. Ha kini ki sngi ki khynroo da chimbynta chitrhem ki wei da yoh chiboon i myntoi lyngba ki waklam.
Ha ka Sngi U Blai da pynkut ya ka da ka Mass wa khooid deiwa emlang u Fr. Probester Nongseij uwa man leh u Parish Priest yong ka Parish Nangbah, u Fr. Ksan Kupar Khongwar uwa man leh u Spiritual Director yong ka seiñ wei da man u leh kam uwa kñia rangbah ha ka Mass wa khooid wei da yoh leh yei klam na u Deacon David Marbangiang, uwa da sneiñ ya ki khynroo wow man kiwa chlur wei wow im sngi ha ka ktien yong u Blai.
Ha ka janmiet, ka seiñ da e khusnaam ko leh ya ki khynroo kiwa da wanrah burom ya ka Parish ha ka Sports Meet yong ka ICYM Jowai Diocese wei da pynhaap pyrda ya ka da u Justin Dkhar uwa man u MLA warim ka 6-Khlehriait Constituency ha i jooh i por kam u Principal yong ka Ambrose Memorial Secondary School Khliehriat.
Da ekti u leh ya ka lama yong ka seiñ cha u President yong Seiñ Khynroo Balang chnong Myrjai kawa da pynman ya ka Convention ha u snem 2022.
Da pynkut da ki kyntien khublei na ka General Secretary yong ka seiñ, ka Nida Wanbiang Pasi.
