Jowai: Ka Seiñ Raij ka chnong Mihmyntdu ynnin ka 11 tarik da pynman ko ya ka Chaad Sukra yong ka ha Mandan Wariong, Lumpyrtuh Mihmyntdu heiwa da wan skahi ya ka da u A. Shullai, Dy. CEM JHADC kam u kongsan wa u Dolloi ka Jowai Elaka u Puramon Kynjing.
U Dolloi hei klam yong oo da ong u wa ka Chaad Surka toh ka laad wow pynyoo yei sñiaw ngooh wow e warom ya ka bei rymaw.
“Ka Chaad Sukra ymtoh du wow pynyoo yei kmen kiwa chaad toh leh u em i kmen nadooh kiwa pyllai ya ka hadooh ki khynnah wa paitke ya ka yow wanrah ya i yatylli neibhah ha pyrthai emkaam i u kyrchaan uwi ya uwi” da ong u Dolloi.
Da ong u leh wa ka Chaad Sukra leh man ko kam i por wow pynthymme yei warim yow maap yei bakla wei lada em iwon iwon i sñiaw wit chi chnong chi thaw chi yung chi sem kani ka sngi toh ka wow pynkhooid noh ya waroh itæ neibhah i kmen i sñiawbha toh man i i dawai bah.
U A. Shullai kam u kongsan da ong u wa sñiaw kmen u wow yoo yei wan chimbynta ki paidbah ha kani ka Chaad Sukra wei neiliang ka JHADC da yoo ko wa emkaam wow pynneh ya i yong u warim, wei ha uni u snem da pynkha ya kawi ka tnat hapoh ka Council yow pynneh pynim ya kini waroh.
U Waheh Chnong ka Mihmyntdu da pdiang sñiawbha u ya waroh wei da pynchlur u leh ya waroh wow pyrchang u tip ki ya ka put ka tem tynre yow lait ki u wiar jait.
Ha kani ka jooh ka sngi da pynman leh ya ka Chaad Sukra ha Sabahmuswang wa pynman da ka Sein Raij Sabahmuswang.
Mihmyntdu
Sabahmuswang
Discussion about this post