Ka Seiñ Khynroo Khyllood Katholik Good Shepherd Parish Ladrymbai da pynman ko yei yachem wa chisien chi snem wa tip kam ka XIX Annual Youth Convention 2021 kawa da pynman ha ka 10, 11 wa 12 tarik uni u bnai ha Balang Pamrakmai, EJH hajrong ka phang: Phi man phi kiwa kordor ha ki khmat yong nga, wei phi da yoh burom phi neibhah wa da jied da nga ya phi Isaia 43:4.
Ha ka sngi sdang da sdang dei ngooh i dem Blai lyngba ka knia ka khriam da u Parish Priest Rev. Fr. Aibor Dennis Nongbah deilang wa u Rev. Fr. James Eleazar Bareh, Spiritual Youth Director. Ha kani ka Convention da wan wai da u Dr. Sanky Shangpung uwa man u Chairman yong ka JHADC kam u kongsan.
Hawa e yei klam kam u kongsan, da kyntu wei pynchlur u ya ki khynroo khyllood wow wan chakhmat wow kit wow bah ya ka lyngkor neibynta i chakri ha ka niam ka rukom, ka chnong ka thaw wa ha ka Imlang sahlang wot hadooh wow hap maad wei chem chiboon i eh wa ki tynjooh wa boon tangwa wow man kiwa yai chah wei yieñ skem ha ka yurim kam ki khynroo khyllood wei ymtoh wow dooh kyrmen.
Ha kini ki le sngi da yoh i sneiñ i kyntu na ki 3 ngut ki bru chemphang namo ki Resource Person kitæ u Becare Me Oo Nongtdu, ka Hildamary Pasi wa na u Fr. Ebormitre Henry Lamare.
Kam wow pynchlur wei e laad ya ki khynroo wow wan chimbynta ha kini ki sngi ka Convention, da em ki yalehke wa boonjait, ki yakob (Cultural Show Competition) heiwa ka Balang Pamrakmai da man ko kam kawa yoh nyngkong, ka Balang Sohkymphor wa ar waka Balang Cham Cham kam kawa yoh wa le.
Da pynman leh ya ka yakob yatai nia namo ka Debate hajrong ka phang: Ki khynroo wa ka Mobile ha ka juk wa katni heiwa ka Juliana Lyngdoh kawa na ka Balang Rangad da yoh ko yei naam Best Speaker.
Ha ka Sngi u Blai da pynman ya ka Mass Wakhooid hawa u Rev. Fr James Eleazar Bareh Spiritual Youth Director kam uwa knia rangbah uwa da pynkupbor ya kiwa kitkaam wa thymme yong ka seiñ.
Ya kani ka Convention da wan wow pynhaap pyrda da u Bhamon Phawa kam u kongsan wei wow saam khusnam cha kiwa jop.
Da chimbyntalang ha kani ka sngi da ki rangbah, ki manbei manpa, ki khynnah wa ki khynroo khyllood wa em kamwa 260 ngut na ki 24 tylli ki Balang chnong wa haap hapoh ka Parish Ladrymbai.
Da pynchongchit wei pynphooh pynphieñ ya kani ka Convention da ka put ka tem, i chaad i kmen wa i rwai i siaw.
Ya kani ka Convention da pynman hei yahkhmat u Ripos Lyngdoh kam u President wa u Wellson R D Siangshai kam u General Secretary.
