Jowai: Ka Dorbar Niamtre yong ka Ri 12 Dolloi-30 Syiem kawa daman ha chnong Nartiang ha ki ar sngi yong ka 21 wa ka 22 Kmaichonglad 2019 daman ko kawa phooh wa phein wei chongkun chongkhia dei wan yachimbynta ki khon ka Niamtre na kylleiñ ki Raij ki chnong.
Ya kani ka Dorbar da pynman dei yakrehlang hapyrdi ka Seinraij oJwai wa ka Seinraij Niamtre Development Organisation, Nartiang wei ha uni u snem kani toh ka sien wa Khatsoo i lai luti yong kani ka Dorbar nadooh u snem 2006.
Ha ka sngi nyngkong yong kani ka Dorbar Niamtre da wan yachimbynta da ki khon khynroo khyllood yong ki Seinraij waphær heiwa ka prokram wa kyrpang toh i yohlaad ki khon khynroo khyllood wow yaklam ya tuklar ya ki kaam niam, rukom, dustur hei yahkhmat ki waheh wasian.
Ha ka sngi khaddooh yong kani ka Dorbar Niamtre wa man ha ka Bibar ha madan Raniaw, ki khon ka niamtre dei sñiawsarong na kylleiñ ki Raij ki chnong dawan ki wow sakhilang ya kani ka sngi heiwa ya ka Dorbar Niamtre da pynllai da u Pator Raymon Nartiang waman leh u Chairman yong ka Niamtre Committee, Seinraij Jowai katwa yei ngoohblai ngoohsyiem da e da siang da u waheh Bright Raliang, ya ka lama ka Seiñ da pynher da ka men Bait Ktung, u waheh Ridon Phalangki, Secretary Seinraij Niamtre Development Organisation, Nartiang da e u ki kyntien pdiang burom katwa u waheh Yiang Maskut, Secretary Organising Committee ha ka bynta wa kut yieñ u wow e ki kyntien sñiawngooh wei kam ka dak wan i kut yong kani ka Dorbar Niamtre da em leh i pynhiar ya ka lama da u waheh Donbait Symblai.
Ki waheh wasian kiwa da e yei klam i kappe ha kani ka Dorbar Niamtre toh u waheh Moina Phyllut, President SNDON uwa da khanna yei parom watbian ka chnong Nartiang, u Dolloi Elaka Shangpung waheh Chanki Langbang uwa da klam hajrong ka phang “ ka Lyngkor ki khynroo khyllood ha ka niam-rukom”, u waheh Spiton Kharakor, Sengkhasi Kmie Mawkhar da klam u ha ka phang “Ha la tynrai”, u waheh S.K. Lato, Executive Member Seinraij yieñ u wow khanna ya ka phang wa ong “ka niam waka dustur” katwa u waheh Moonlight Ktung, Chairman Organising Committee, Nartiang yieñ u wow pynsñiaw heiyatoh waka lehniam Durga Puja waka Niamtre” wei chooh chooh da yoh leh yei kyntien e mynsien wei kitbok kitrwiang ya warohlang kiwa wan ha kani ka Dorbar Niamtre na u Dolloi Elaka Nartiang.
U waheh Chanki Langbang hei klam ya ka phang, da khut kyrsu kyntu u ya ki khon khynroo khyllood wow man kiwa tyrnit tyrna wei em i kit khlieh wei kitkhia yei kamram kam ki khon khynroo khyllood neibhah ka mynried chong ko ha ki wei ong chooh chooh u leh kam ki khynroo khyllood hawa man phi kiwa em yei stad ham tadkjat tadkti wow man kiwa tip khamtam ha ki kaam niam rukom.
U waheh S.K. Latoo won hawa e khubor ha kani ka dorbar Niamtre da kdar yahkhmat u wow ong ka Niam u Niaw Wasa- Niawtrep Niawskum toh ka niam kawa u Blai Trekirot da e kyrpang u nachwa na lap ki sngi heiwa ha ka da pynchong pynthiah sarin pa sarin ya ki rukom wa ka dustur kiwa man ha ki dur waphær wei da pynskan u leh wow ong wa ka Niam wa ka Dustur lai lang ki chirrup wei lada kawi na kini dooh ko, pyndooh ko yei man kyrpang ka jaitbru. Ong chooh chooh u leh katni ki sngi kyruiñ liang wanang, yoo chem yei hiardor ka dustur riti neidaw wa da khleh takulen ya ka niam wa ka dustur da ka luti wym yahapdur yahapsur.
Iwa yoosuk chooh chooh u sakhi nalor i klam i kappe yong ki waheh wasian da pynchoh pynchongchit wei pynphooh pynpheñn ya kani ka Dorabar Niamtre da ki rwai wa ki chaad sur tre yong ki khon khynroo khyllood na ki raij ki chnong waphær.
Discussion about this post