Silchar : Ka Freshers’ meet kawa jooh pynman man u snem da ka Khasi Students Union, Barak Valley Circle da man ko kawa chongchit chongkun bha kawa pynman hapoh Gandhi Bhawan ha Silchar, Assam ha kani ka 5 tarik uni u bnai.
Ha kani ka yalang da emlang u Rev H.C Lamare uwa man kam u kongsan ha kani ka yachem lang, Education Secretary ka KSU Central Body u Donald Thabah, President KSU Jaintia Hills Circle u Ohibait Dkhar , President KSU BVC u Morningstar Suja, General Secretary KSU BVC u Wanbor Pdang, Asst G.S. KSU BVC u Lovingwel Mukhim, u G.S. yong ka KJDCDC u Charles Rymbai hei emlang lang ki khynroo khyllood na ri-loom Khasi wa Jaiñtia wa puræ ha kani ka chnong kamjooh wa kiwa da im da sah ha ki le tylli ki District yong ka jylla Assam.
Ha chwa wow sdang ya kani Freshers’ Meet u General Secretary yong ka KSU Barak Valley Circle ong u wa man u snem ka seiñ Khasi Students Union BarakVvalley Circle jooh pynman ko ya kani ka Freshers’ Meet wei jooh saam ki leh ya ki khusnam cha ki wa puræ kiwa leh bha ha ki exam waphær waphær yong ki.
U Education Secretary ka KSU Central Body u Donald Thabah hei klam yong oo da ong u wa sniaw sarong u ya ki paid yong i kiwa chong wa sah ha kini ki thain, yei ri sumar ki ya ka riti dustur kamjooh yei wa man ki kiwa ya tylli.
U kongsan u Rev H.C. Lamare da pynsniaw u yei kmen mynsien yong oo wow emlang ha kani ka Freshers’ Meet deiwa e khublei u ya ka KSU Barak Valley Circle yei wa ye ki pynman ya kani ka yalang nei bynta kia para doh para snam kamjooh leh yei wa man ka seiñ kam ka wa yada ya ki jait bru wa em ha kini ki thaiñ.
Da saam leh ya ki khusnam cha ki 11 ngut khynnah puræ kiwa da leh bha ha ki exam waphær waphær wei da pynman leh ya ka yakop Miss and Mr. Fresher.
Discussion about this post