Amlarem : Ka lehkmen kynmoo warom ya ka sngi laitlooid yong ka ri India ha Amlarem ynnin da man ko kawa chongkhia heiwa ki paidbah da wan tooid ki da ki hajar ngut cha kani ka lehkmen.
Ha Amlarem ya kani ka leh kmen da pynman da ka Amlarem Civil Sub-Division heiwa ya ka lama yong ka ri India da pynhær da u Parliamentary Secretary ka Sports & Youth Affair yong ka sorkar jylla u Stephanson Mukhim.
Ha kani ka jooh ka sngi da saam khusnaam cha ki khynnah kiwa wan cha khmat ha ka Exam SSLC kiwa khynthup ya ka Tympangika Biam kawa yoh 90.33% na ka school Syiem Jingsuk Secondary School, ka Susana Mulat kawa yoh 83.16% na ka Syiem Jingsuk Secondary School hi wa u Kynshanlangki Khynriam uwa yoh 82.31% uwa na ka Amwi Thangbuli Secondary School.
Da saam leh ya ki Work Order hapoh ka MGNREGA cha ki chnong kiwa kreh bha ya kani ka scheme kiwa khynthup ya ka chnong Lamin, Satpator, Trangblang, Kudengrim, Darang, Jaraiñ wa ya ka Khonglah.
Da em leh i pynyoo rong ya ki chaad ki rwai tynre wa ki sur maya ri na kiwa boon ki school waphær wahær kam na ka Sohkha Govt Hr. Sec School, Amwi Jarain Secondary School, Syiem Jingsuk Secondary School, Amwi Thangbuli Sec. School wa ka Amlarem Sec School.
Ya ka March Past yei naam jop da rah da ka Sohkha Govt Higher Secondary School, wa ar ka Syiem Jingsuk Secondary School katwa ka Amwi Jaraiñ da yoh wa le ko.
Discussion about this post