Jowai : Ka office yong ka District School Education Office, Jowai ynne ka sngi da kynmoo warom ko ya ka sngi wa kyrpang yong kiwa sikai ka West Jaiñtia Hills District ha ka yalang wa pynman ha District Library Auditorium, Jowai.
Ha uni u snem da man ko ka kynti wa 55 wow lehkmen ya ka ‘Teacher’s Day’ heiwa u Deputy Chief Minister, Dr. R.C Laloo da man u kam u kongsan.
U Dr. R.C. Laloo ong u wa hadooh katni kynmoo bait u ya kiwa sikai nadooh kiwa sneiñ, kiwa mai, kiwa e mynsien ya oo neibhah waroh ki yarap ki u pynpoi ya oo cha i kyrdan wa em u katni. Kam u wa sikai hi aw jan waroh i rta u, wei dang ynnin u snem da chongngiah u kam uwa sikai, ong u wa ym toh u sñiaw wa yei kreh chitom kiwa sikai u kynmoo i ya ki du chisien chisnem tangwa yeiwa e ki ha ki khynnah da kynmoo ya ki man ka sngi wa im ki.
U S.P. ka West Jaiñtia Hills u R. Muthu ong u wa haddooh ki dak wa thoh u, i wow jied yei wa bha wa iwa sih toh iwa da booh symbe kiwa sikai nadooh dang khian u.
Kiwi de kiwa klam ha kani ka sngi toh ka kong D. Khongiong (DSEO) kawa e leh yei ktien pdiang sñiawbha wa na u W.S. Challam, Retd. Joint Director of School Education & Literacy, Meghalya, Shillong.
Ha kani ka sngi leh da saam ya ki khusnaam cha ki le ngut kiwa sikai kam wow tipmit yei kreh chitom yong ki heiwa da e ya ki da ka District Award. Na ka skur Marian Hill Higher Secondary da yoh u Telesphor Shangpliang, B.A. B.Ed, uwa da sdang u sikai nadooh u snem 1987 kam u Assistant Teacher.
Da saam khusnaam leh cha ka kong Modistalin Marbaniang, BA (Khasi) na ka St. Mary Mazzerello Girls Higher Secondary School kawa sdang u sikai nadooh u snem 1984.
Ka kong Kret Suna na ka skur Mukhla Raij Upper Primary School, Mukhla leh da yoh ko ya kani ka District Award.
Da pynkup burom leh ya i naam ‘Best Scout Master’ cha u ma Pet Dkhar na ka Nangbah Government Upper Primary School wa cha ka kong ya i naam ‘Best Guide Captain’ da e cha ka kong Melisha Dkhar ka wa na ka skur Church of God Ummulong.
Da pynkut ya kani ka sngi da ki rwai, ki chaad, ki yalehke danda wa ki chaad tynre na ki skur ka West Jaiñtia Hills.
Discussion about this post