Kamwa jooh man khlieh ki snem, ynne ka sngi ki khon Niamtre ka Raij Mynso da pyndep ki ya ka Lehniam Chaad Tyllu kawa man ka lehniam chwa wow hiar rep ki cha hali wei ya kani ka lehniam da pynman ha Madan Dieñtyllu, Mynso-A, West Jaiñtia Hills.
Kani ka lehniam ha uni u snem da sdang ko nadooh ynnin i miet da i Chaad Synyaaw na Loom Lariang wei da kynrud kajiak chisien dei dien hadooh wa poi ha Madan Dieñtyllu chirup i tem ya ka ksiñ, ka lakudiah wei put ya ka chawiang.
Chwa wow pynman ya ka Lehniam Chaad Tyllu ynne ka sngi, da em ka yalang wa pynlai da u H. War uwa man kam u President ka Seiñraij Mynso, heiwa u Comingone Ymbon, u MLA ka thaaiñ da man u kam u kongsan katwa u Eveningstar Teron, u MDC ka thaaiñ da man u kam u symbood kongsan.
U Pynhunmi Chen uwa man u Secretary ka Seiñraij Mynso da khana u wa kani ka lehniam da pyndep chwa wow hiar cha hali hator wow bet wow thung ya u symbe u kba wow man iwa bha wa miat ya ki khon ka Raij waroh kawi.
Da ong u wa kani ka lehniam da pyndep katkam wa yah wa pynjooh ka Niamtre lyngba ki warim ki waheh wasian.
Neiliang u Comingone Ymbon hawa e yei klam da kyrmen u wa u Trekirot wow yada u ya ka chnong ka thaw wei wow kynriah u ya ka khlam ka dait kamjooh wow wanrah ya i bha i miat. Da kyntu u leh ya kiwa kitkaam ka Seiñraij wow dang pynphooh chooh chooh ya kani ka lehniam ha ki snem wow wan.
Da yooluti u leh wa ya ka Khnap Thang-bru ka Raij daw ye wow pyndep noh ya ka ha ki 5-6 bnai deiwa ong leh wa nei ku dor ki mar neiliang yong oo u e yarap u sa T. 5 lak wow pynmiat ya kani ka khnap.
Ha kani ka yalang da yoh ya ki kyntien pdiangburom na u W. Shylla, wei da yoh ya i ngoohblai na u Kynmoo Situng. Kiwi kiwa da e yei klam ha kani ka sngi toh u Kamniapia Challam, u Dolloi ka Elaka Mynso u Karmi Myrchiang, u Dolloi ka Elaka Shangpung, u Chanki Langbang, u Dolloi ka Elaka Jowai u Puramon Kynjing wa kiwi kiwi.
Hadien ka yalang ki khon khynroo khyllood da chaad ki iwa man chibynta yong kani ka lehniam deiwa ksoh-kti lang hei kieh ki sur ka chawiang, ka ksiñ wa ka lakudiah.
Manda dep i chaad ki khon ka Raij da pyndep won ki ya ka Kñia Syiem Tyllu hapoh i pait i yoo u Dolloi, u Pator wa ki waheh wa sian heiwa da kñia da u sñiang.
