Chongkun ka Nohsakyriat deiwa chimbynta chongchit ki khon ka Seiñ Raij Ialong

Ka Seiñ Raij Ialong ynne da pyndep ko ya kawi na ki riti dustur kamjooh ka lehkmen wa rap phær bha hapoh Ri-loom Jaiñtia, katæ ka Nohsakyriat kawa da sikai wei da pyndep nadooh ki por yongrim kawa da pynman leh deilang waka Leh Niam Thoh Ryngkaw.

Kani man ko leh kam chibynta wow e ngooh e dem chwa wow hiar u bet ya u symbe cha ki hali pynthor wei man ko kawi na ki lehniam wa heh dooh ka Raij Ialong.

Ya kani ka Nohsakyriat ha uni u snem da wan wow wai da u Dolloi ka Elaka Jowai, u Puramon Kynjing uwa da pynchlur yaka Raij Ialong wow pynkhai ym biang ya iwa rim dei wym toh u tieñ wei da pynkynmoo u leh wa ka Nohsakyriat deilang waka Chaad Sukra toh kiwa da pynman yow pynkynmoo ya i yei kordor ki riam ki bait tynre kamjooh i chaad, i rwai i siaw wa i tem i put.

U President ka Seiñ Raij Ialong, u Pyrkhat Shylla hawa e yei klam da ong u wa da yaleh hi wow pynkhai im leh yaka Chaad Pastieh ha Ialong tangwa nadooh wa chah knieh ki tiar ki tar ha ki pharæng da chem chitom bha wow sdang biang ka.

Heiyatoh won wa kani ka Nohsakyriat da pyntip wa yaka lehniam da sdang nadooh ka 22 tarik uni u bnai da ka Khrong Ka Kri kawa man ka lehniam kawa nadooh warim wajah wei ha Ialong da em ar tylli ki lehniam wa heh kawa kynthup ya kani ka Nohsakyriat deilang waka Chaad Sukar neitæ won ka Behdieñkhlam.

Dang step ynne won da pyndep ka Knia 30 Ryngkaw wa da pyndep hei yahkhmat u Langdoh waki Khynde Wasan wei waroh man ko kawa miat wa bha wei da em kyrmen wa ka rep ka riang u man ko kawa miat wa bha.

Da pyntip u wa ka Nohsakyriat nachwa toh kawa da pynman neibynta u chimbynta ki kynthai katwa ka Behdieñkhlem won toh neibynta ki chynrang tangwa katni da kylla i por wei da chah ya ki khynnah chynrang u chimbynta wei ki kynthai waroh nadooh kiwa dang khian, dang khyllood kamjooh ki manbei ka Seiñ Raij Ialong chah wow chimbynta ki ha kani ka Nohsakyriat.

Yow tip leh kiwa dang khian wow chong Nohsakyriat da chna ar tylli ki Sakyriat khian khnang manda heh ki yow suk ki yow lait ki u sa’ih.

Ka Nohsakyriat ynne da man ko kawa phooh wa phieñ wei kawa chongkun heiwa ki kynthai wa chynrang da wan ki wow chimbynta dei mynsien wa kmen chirup i riam i bait yong tynre heiwa i bynta ki chynrang toh wow pynskit ya kini ki Sakyriat chawah chaneiñ.

Ha kani ka sngi neiliang ka Committee Khynde Wasan hapoh i yahkhmat u Langdoh da pynkup burom ya u Salan Shylla uwa jooh man kam u Chutia wa u Charli Dhar uwa jooh man kam u Maji.