Ka Seiñkur Bahkhla Central Body wa kynthup ya ka kur Rymbai, Ryngkhlem, Kyndait, Sana, Lyngdoh (Rymbai), Toi, Najiar, Lato, Thma, Chynret, Ksoo, Kyndiah, Rymbui, Pdein (Sana), Bang (Rymbai) wa Khaii ynnin ka 27 tarik da pynkup burom ko ya ki khon ka Seiñkur kiwa lehbha ha ki kyrdan waphær waphær yong u snem 2020.
Ya ka dorbar ka Seiñkur da man ha Mihmyntdu Loompyrdi, West Jaiñtia Hills.
Ka yalang ha kani ka Dorbar da pynlai da u R.K. Ram Rymbai uwa jooh man leh u President wa nyngkong dooh yong ka Seiñkur heiwa da yoh leh ya ki kyntien pdiang burom na ka Violet Lyngdoh.
Ya i rwai pdiang burom da yoh na ki khon ka Seiñkur Bahkhla Mihmyntdu heiwa da yoh leh ya ka bui krehkaam ya kawa da puræ da u General Secretary u Joinly Ksoo.
Ha kani ka sngi da yoh leh i klam sneiñ kyntu na ki waheh wasian ka Seiñkur kiwa da klam katkam ka phang wa da e ha ki wei kini kynthup ki ya u Lakhon Ryngkhlem, u Cometstar Kyndiah, ka Yohi Kyndait wa u Chanbor Rymbai.
Ya ki kyntien ekhublei da yoh na u Selfdeniel Lyngdoh.
Kani ka sngi yachemlang da man ko kawa chongkun wei da pynphooh ya ka da ki chaad wa ki rwai tynre na ki khon ka kur kiwa na Mihmyntdu.
