Jowai: Ka yakop Chaad kawa ka wow yaknieh yei naam All Jaiñtia Dancing Super Star, kawa pynman da ka All Jaiñtia Dancers Association (AJDA), da man kawa chongkun wei kawa chongchit bha, ya kani ka yakop chaad da pynman ya ka ha District Library Auditorium Mynthong Jowai hei janmiet ka 8 tarik.
Ha chwa wow sdang ka yakop chaad da em ka yalang wa tbian kawa da pyllai da u President ka Seiñ AJDA u Kyrshan Rymbai, ha kawa u ma Kmen Shylla, Waheh Chnong ka Wahiajer da man u kam u kongsan.
Da pyn wyrngia chooh chooh ya ki paidbah ha kani ka yakop chaad dei wa em bynta lang u Michel Syiemiong uwa man u wa chaad wa paw naam, uwa da poi chadooh ka top 20 haka yakop Dance India Dance (DID) Season 5, kamjooh leh ka khyllood ka Daphisha Kharbani kawa da yoh rah ya ka Golden ticket ha ka “So You Think You Can Dance” yong ka Ri India, hei jooh i por da wan wow chimbynta leh da uwi na ki wa rwai wa paw naam yong ka ri-loom Jaiñtia u Ram Suchiang.
Ha kani ka yakop chaad da wan wow chim bynta hadooh kam wa 40 ngut ki wa chaad khynthai wa chynrang na kyllieñ ka Ri Loom Jaiñtia. Ha kani ka yakop waroh kiwa da wan yachim bynta da pynyoo sakhiat ki yei sap yong ki, tangwa ha kani ka yakop chaad ya i naam wa nyngkong da yoh da u Serial Syrti na Jalaphet, wa ar u Damon Niang na Nongjngi wei i naam wa le da u Golden na Khliehiongriang Jowai.
Discussion about this post