Ka seiñ ki bru kiwa im wa u khñiang HIV ha Meghalaya kawa tip kam ka Meghalaya State Network of Positive People (MSNP+) da pynsñiaw ko yei wym yahaap yei leh ka sorkar wow leh burom ya ka World AIDS Day 2025 kawa daw pynman ha ka 1 tarik u December deiwa ong wa ki kam kiwa chah ktah toh u em ki hakhmat yow yahluti tangwa da chah booh ki chadien neidaw wym kwah ka sorkar wow tip ka pyrthai yei sakhiat.
Yeini da ong neidaw wym em e laad ya ki wow klam ha ka World AIDS Day tangwa da khut ya ki wow man ki kam kiwa chong wei suki donhi wot hawa ka NACO da ong ko wa kiwa em HIV toh u embynta ki. Da kdaw leh wa ka Meghalaya Users Forum (MUF) wa ka MeduNet kiwa da kreh da palat 10 snem yow kyrchaan ya kitu kiwa im wa u HIV kamjooh kiwa pynemkaam Drugs wym em tang u khut ki leh.
Da ong ki wa ki bru wa em hei bor manda chim ki kawon kawon ka rai toh u tip ki na kiwa chah ktah ymtoh lyngba kiwi neibhah ki ym tip ki yeiwa jia sakhiat.
Da kdaw leh wa ki khynnah wa em ya u HIV da ku ki kat dang lai ki sngi wei la 11 bnai ka MSNP+ da yaklam ko wa ki chnat sorkar tangwa ym em yoh jubab heiwa wot ka Basic Diagnostic Test kawa jooh man dei mynkna wei ki Check Up katni da man ki kiwa thut bha hadooh wym tip de kammon jia ya kitu kiwa da tip kam kiwa em ya u HIV. Manda jia kamni kiwa yoh ya u HIV leh dang ku ki kamjooh kiwa yoh Hepatitis C.
Ha East Jaiñtia Hills kiwa kreh ha ki ICTC, STI wa SSK da hap ki wow pynman yei yasyllok ha ki kamra booh tiar wei kamni da chem chitom wow murieh yei long i man kini kiwa chah ktah. Wot ka ART Ialong Civil Hospital leh man ko kawa khynnia wei ym yahaap de wow leh ya iwa emkaam.
Kamwa man kattæ ka sorkar ym kwah ko wow klam chaphang ini waroh tangwa da pynjoor du yei pynriam wei pynyoo rong wei ya chondur yow pynyoo cha ki Social Media.
Hajrong ini da ong wa ha ka World AIDS Day, ka sorkar kwah ko wow pyndap ya ki thaw chong donhi tangwa wow murieh yei sur kiwa chah ktah wei ym pdiang yeini wow batai da kitu ki wym tip iyi iyi yeiwa chem chitom wei wow chim rai ki ya ka mynried khlem da emlang ki.
Kamtæ da ong wa lada ka Meghalaya kwah sakhiat ko wow ye u leh yeiwa emkaam hap chwa ko wow pdiang wa ini wa jia toh i tlot i rukom kreh wei yow pynkylla yeini hap wow e ya u Microphone ha kti kiwa chah ktah yow klam ki neibynta yong ki hi ymtoh da kiwi neibynta yong ki.
Iwa da pynchrai chooh chooh wa ha ka World AIDS Day 2025 ka sorkar da khut ko da ki Doctor wa bna naam, ki Fashion Model wa ki Influencer heithaw wow burom sakhiat ya kitu kiwa da kreh chitom yow pynim ya kiwa chah ktah, “Boi mynried snem uni u khñiang daw yut u na Meghalaya manda yoo yeini wa phooh phieñ ka lehkmen ha Meghalaya,” pynkut ka kyrwoh.
Discussion about this post