Hadien wa mih ka khubor wa da pyndam (de-sanction) ka Empowered Sanctioning Committee ka sorkar jylla ya ka Entry Point ha Umling, Ri Bhoi District, neiliang ka dhab ki seiñbhalang wa kynthup ya ka KSU, GSU, FKJGP, HNYF, AYWO, HNYF, RBYF wa ADE da sñiawkhia ki yeini i leh ka sorkar.
Da ong ki wa ini i leh ka sorkar pynyoo i wa ym kheiñkor ko yei wan psiah ki bru na baar jylla wei ka jylla da chah ktah joor bha ko nei psiah ki baar jylla nadooh chwa wow sdang ya ka jylla.
Kini ki Entry & Exit Points, toh i bynta ja Meghalaya Residents’ Safety and Security Act 2016 wei da mih i hadien i yaklam wa joor wa ka sorkar warim ka jylla kawa hapoh i yahkhmat u Dr. Mukul Sangma neitæ won u Conrad Sangma.
Chooh chooh da ong ko wa kani ka aiñ yaleh ko wow kdoh u khoom ya i wan psiah wa i mih ki bru na ka jylla chwa wow pynkrehkaam ya ka Bengal Eastern Frontier Regulation 1873 namo ka ILP, kawa da man i dawa ki seiñ nadooh u 1985 wei ka MRSSA em ko ki kyndon wow pait yei psiah wei chong chnong ki baar jylla hapoh Meghalaya wei ye ko leh u pynchitom ya kiwa leh pyrchah.
Kamtæ da dawa ki yei pynche wa neiyi i daw wa pynsangeh ya ka Umling Entry Point neibhah ki seiñ neipor cheipor dawa ki wow pyndep smat ya kini ki thaw psiah thaw mih na ka jylla.
Heijooh i por da dawa ki na ka sorkar wow pynyoo ko ki kaam hajrong hadooh katwon chimkhia ko wow leh yeini i kaam wa wan psiah ki baar jylla? Lada kwah ka sorkar wow chimkti ki da ki yeini i kaam da ki? Neibhah lada man iwa emkaam, ki seiñ daw leh ki yeiwa emkaam pyn daki hi.
Da kylli ki leh wa iyi wa jia ya ka ILP Resolution wa da rai ha Assembly ha ka 19 Kmaichonglad (December), 2019. Hadooh katwon da poi ini i kaam? Lada em i yaklam wa ka sorkar pyrdi?
Chooh chooh da maham ki wa waroh chi kattu da man ki kiwa yaichah wei da emkaam wow leh ki iyi iyi hajrong ini.
