Ka KSU Narpuh Circle ynne ka sngi da lai ko cha ka chnong Brichyrnot, East Jaiñtia Hills da i thmu wow lai chimbynta ha ka Public Hearing wa da pynman da ka Meghalaya State Pollution Control Board (MSPCB) hajrong i kwah ka M/s Green Valley Industries Ltd wow yoh tih moo (Shale Mine) ha Brichyrnot ha i thaw wa heh 4.77 Hectare.
Tangwa iwa pynsñiaw lyngngoh won ya ka seiñ toh hawa poi ha katai ka thaw pynman Public Hearing heipor 11:00 waje i step, da pyntip cha ki wa ka Public Hearing da kut ko.
Ini mut wa da sdang heipor 10:00 waje i step katwa hei pynbna namo ka Notification toh wow sdang heipor 11:00 waje i step. Kamtæ ka seiñ ym yoh de ko wow chimbynta wei wow pynsñiaw hajrong i ktah næ ym ktah ya ka rym-aw.
Ka seiñ da ong ko wa ini i leh ka State Pollution Board toh iwa em iyi iyi wa cha kylla wei ka seiñ ym pdiang ko yeini da kammon kammon leh.
Da dawa leh na ka MSPCB wa hap wow pynman biang ya kani ka Public Hearing da iwi neibhah chiboon ki paidbah wa ki bru wa bna pyrtuid kiwa kwah wow chimbynta ym yoh de ki wei ki leh da pynsñiaw ki yei lyngngoh wei sñiawdiaw.
Hawa thooh bniah chooh chooh ka seiñ da chem wa ka Pandal kiwa da chna toh du i dur donhi katwa ya ka Public Hearing da pynman hapoh ka yung chnong namo ka Community Hall.
Kamtæ ka seiñ da ong ko wa lada ka sorkar e bor namo ka Clearance ya katai ka karkhana wow tih ya uni u moo (Shale) ha katai ka thaw wei lada jia wa tngit wei sih ki um wa em soodong kam ka wah Umtalen waka wah Lukha, ka seiñ daw lai khang ko ya katai ka Shale Mine.
Ka kyrwoh na u K.S. Suchiang, President ka KSU Narpuh Circle.
Discussion about this post