Ka yung kasari Meghalaya High Court ynnin ka sngi da chong bichaar ko ya ka mukotduma wa ujor u muktiar Kynjaimon Amse pyrchah ya ka National Highways Authority of India (NHAI) heiyatoh wa i sih ware u sarokbah NH06.
Ka NHAI da kular wa daw dep u pynchna ya u sarok chwa ka 15-12-22 hawa e yeu jubab cha ka yung bichaar.
Hajrong ini, ka High Court da kyntu ko ya ka NHAI wow booh bhah ka poisa rap boon wow chna pynmiat ya ki sarok wa sih neipor cheipor hapoh ka jylla lada deiwa chimkti ya ki sarokbah ka jylla (State Highways) kamwa da leh ha waroh kawi ka ri næ deiwa chna da ki sarok wa thymme ha ki thaw ri-loom.
Da phah ya ka sorkar wow pynkreh ya ka rukom krehkaam wow pyntikna wa ki sarok neh ki hanla joor u slap leh.
Chooh chooh da ong ko wa ka sorkar toh u pyntikna ko wa em ka poisa wow chna pynmiat ya ki sarok hapoh i por wa biang hanla chem chitom leh wow yoh poisa tangwa ym hoi u mylliñ yei hok ki bru wow yoh ya ki sarok wa biang hapoh ka jylla.
Kamtæ da phah ya ka sorkar wow wanrah ko ya ka bui kammon da mang ko wow leh yeini deiwa booh thij yei por hawa pynkreh wei pynchna sarok.
Ya kani ka mukotduma u chong bichaar biang ha ka 13-12-2022.
