Ka yung krehkaam yong ka Assistant Commissioner of Food Safety, West wa East Jaiñtia Hills District da pyntip paidbah khamtam ya kiwa dai doh (doh masi, doh syiar, doh sniang, doh blang, dakha wa kwi de kam kini) wa kamwa da kdaw neipor cheipor na ka yung krehkaam ya kiwa dai ya kini ki jait mar wa hap ki wow pyndep wei bood pynrkhiñ khnang wow kohngooh ya ka hukum namo ka Oder yong ka Meghalaya High Court wei wow burom lyngba ka PIL No.2 yong u 2021 tarik 14.06.2022 wa 20.05.2022 deilang waka PIL No. 7 tarik 17.08.2023 wei kani ka pynbna wa katni toh ka laad wa khaddooh wa ka yung krehkaam ka Assistant Commissioner u e por ya kiwa dai doh wow pyndep yeiwa emkaam kamwa da dep kdaw ha ki Notice wa da dep saam cha kiwa dai doh kiwa man kamni:
Kiwa dai doh hap ki wow Register ya ki dukan yong ki waka Food Safety Department (FSSAI).
Kiwa dai doh ki wm pu su yaka kuna hadien wa da yoh “NOTICE” wa da chah daiñ kuna ki, daw hap ki wow su noh wut-wut hanlada dep ki wow pynbha pynmiat ya ka dukan yong ki.
Kiwa dai doh kiwa em ha rood sarok toh u kah ki ya ka dukan nakhmat wei neiliang wa chynna ki bru hap wow booh da ka yit rong yong kawa 40%-50% i doom khnang wa ki bru kiwa lai luti ym yoo ki yei doh wa em hapoh. Kam ka nongmuna u thoh ki da ki dak rong soo “Heini dai doh sniang” wa kiwi de wa yatoh wa ki.
Da khang pyrchah wow booh næ wah tyngkrang yei doh ha ki dukan khamtam ha ki dukan wa em ha rood sarok tangwa wow booh hajrong ka kynja miej næ kamwa da kdaw haneiñ.
Ki dukan toh u man ki kiwa lehkhooid bha (hapoh ka dukan, soodong ka dukan wei kamjooh leh kiwa dai doh).
Yei doh toh u booh bha yow lait na ki pharæ wa i lapooh kam hapoh ki Fridge, ki kchu, ki dabor wot ha ki Showcase/synduk næ deiwa kær khamtam ya ki dukan wa em harood sarok.
Ki dukan kiwa em cha jngai ki sarok/Highway næ kiwa em hapoh ki yaaw ye ki wow em ki Showcase kiwa da ki jaar yow lait u hiar u pharæ, wei ki jaar toh u e rong yow lait nei sap sarah.
Lada ya ki dukan ym ye wow chna da ki Tiles na ki daw waphær waphær, kiwa dai ye ki wow e rong ya ki dukan yong ki da ka rong wa ye u sait man-ka-sngi.
Yow leh yeini waroh da e por hadooh ka 31-03-24 ha East wa West Jaiñtia Hills, lym kamtæ daw ngat da ka mukotduma hapoh ka yung bichaar.
Ini leh man ko i jooh ya ki Restaurant, Dhaba, Fast Food, dukan cha, dukan dai baam dih cha, kiwa dai khoo, dai jhoor, Guest House wa kamtæ ter ter wa hap ki wow Register ya ki dukan yong ki waka Food Safety Department (FSSAI) hapoh ka 31-03-24.
Lada em kiwon kiwon ki dukan wa dai da ki mar wa da kut tarik, daw wan kem ya ki mar da ka yung krehkaam ka Assistant Commissioner of Food Safety khlem iwon iwon i pyntip chwa hadien ka 31-03-24. Lada em kiwon kiwon ki mar wa da kut tarik hap booh ki charood deiwa kdaw che wa kini toh kiwa da sih.
Discussion about this post