Hadien wa hiar kiwa dang em ya u COVID-19 ha India ynnin ka sngi da 544 ngut, ha kini ki 24 kynta da hiar biang da 3,734 ngut katkam wa kheiñ ka Ministry of Health & Family Welfare.
Kiwa dang chah ktah ha kini ki 24 kynta da em ki 55,079 ngut heiwa kiwa chait da em ki 57,937 ngut, kiwa dang yap 876 ngut katwa kiwa dang em ya uni u khñiang da duna ki da 3,734 ngut.
Ki jylla wa boon dooh kiwa dang chait toh ha Maharashtra wa em 11,391 ngut, Andhra Pradesh 7866 ngut, Karnataka 7071 ngut, Tamil Nadu 5667 ngut, Uttar Pradesh 4376 ngut wa ha Bihar 4128 ngut.
Da em leh 16 tylli ki jylla kiwa da duna kiwa dang em ya u COVID-19 heiwa ki jylla da hiar dooh toh ka Maharashtra 3126 ngut, Bihar 1672 ngut wa ha Andhra Pradesh 1168 ngut.
Kiwa chait hapoh ka ri da em ki 73.18% iwa ku naka 72.51% kiwa em waroh 19,77,779 ngut. Kiwa dang em ya uni u khñiang da em ki 24.91% iwa hiar naka 25.57% kiwa em waroh 6,73,166 ngut katwa kiwa yap da em ki 1.92% kiwa em 51,797 ngut. Waroh kiwa da dep yoh COVID-19 da em ki 27,02,742 ngut.
Kiwa chait da tam ki da 13,04,613 ngut ya kiwa dang em ya uni u khñiang iwa ku da 61,671 ngut nadooh ynnin ka sngi.
