Kiwa yoh COVID-19 ha India da kynjoh ki 30 lak ngut deiwa em 69,878 ngut kiwa dang chah ktah ha kini ki 24 kynta iwa man leh iwa boon dooh ha ka chi sngi katkam ka yukheiñ ka Ministry of Health & Family Welfare.
Kiwa dang chait da em ki 63,631 ngut iwa man leh iwa boon dooh haka chi sngi, kiwa yap da em sa 945 ngut, katwa kiwa dang em ya uni u khñiang da ku ki da 5,302 ngut.
Ki jylla wa boon dooh kiwa chait toh ha Maharashtra kiwa em 11,749, Andhra Pradesh 8827 ngut, Karnataka 6561 ngut, Tamil Nadu 5764 ngut, Uttar Pradesh 5567 ngut, Bihar 3892 ngut wa ha West Bengal 3082 ngut.
Ki jylla wa ku dooh kiwa dang em ya uni u khñiang toh ha Maharashtra 2073 ngut, Karnataka 917 ngut, Andhra Pradesh 626 ngut; katwa kiwa boon dooh kiwa hiar kiwa dang em ya uni u khñiang toh ha Bihar 1426 ngut, Uttar Pradesh 726 wa ha Assam 626 ngut.
Kiwa da chait hapoh ka ri da em ki 74.69% iwa ku naka 74.30% kiwa em 22,22,577 ngut, kiwa dang em ya uni u khñiang da em ki 23.43% iwa hiar naka 23.82% kiwa em 6,97,330 ngut, wa 1.87% kiwa yap kiwa em 55,794 ngut. Waroh da poi 29,75,701 ngut kiwa da dep yoh.
Kiwa chait da tam ki da 15,25,247 ngut ya kiwa dang em ya uni u khñiang iwa ku da 58,329 ngut nadooh ynnin ka sngi.
