Kiwa chah ktah ha u COVID-19 ha India haka sien wa nyngkong haki 24 kynta da tam ki 40 hajar ngut deiwa em 40,425 ngut katkam ka yukheiñ ka Ministry of Health and Family Welfare deilang waka ICMR.
Kiwa chait da em ki 22,664 ngut, kiwa yap da em sa 681 ngut katwa kiwa dang em ya uni u khñiang da ku da 17,080 ngut.
Ki jylla wa boon dooh kiwa ku kiwa dang em ya u COVID-19 toh ka Maharashtra kawa em 5,354 ngut, ka Andhra Pradesh 3,858 ngut, ka Karnataka 2,739 ngut, ka Uttar Pradesh 992 ngut, ka West Bengal 898 ngut, ka Bihar 652 ngut waka Kerala 647 ngut.
Ka Delhi dang pteiñ biang i hiar kiwa dang em ya u COVID-19 la 13 sngi heiwa da duna sa 680 ngut.
Hapoh ka ri kiwa chait da em ki 62.62% iwa da hiar naka 62.82% kiwa em 700,087 ngut, kiwa dang em ya uni u khñiang da em ki 34.92% iwa ku naka 34.65% kiwa em 390,459 ngut, kiwa yap da em ki 2.46% kiwa em waroh 27,497 ngut. Waroh kiwa chah ktah da em ki 11,18,043 ngut.
Kiwa chait da tam ki da 3,09,628 ngut ya kiwa dang em ya uni u khñiang iwa ku da 5,584 ngut nadooh ynnin.
