Kiwa dang chah ktah ha u COVID-19 ha India da ku biang cha ka 60 hajar hadien wa hiar ynnin ka sngi heiwa ha kini ki 24 kynta da em 60,963 ngut katkam ka yukheiñ ka Ministry of Health & Family Welfare.
Kiwa chait nadooh ka 2 tarik uni u bnai da em bait palat 40 hajar ngut heiwa ha kini ki 24 kynta da em 56,110 ngut iwa man leh iwa boon dooh haka chi sngi iwa da pynpoi ya kiwa chait cha ka 70.38%. Kiwa dang yap da em ki 834 ngut katwa kiwa dang em ya uni u khñiang da ku ki da 4,019 ngut.
Ki jylla wa boon dooh kiwa chait toh ha Maharashtra 10,014 ngut, Andhra Pradesh 9,113 ngut, Karnataka 6,473 ngut, Tamil Nadu 6,005 ngut, Uttar Pradesh 3865 ngut wa West Bengal 3067 ngut.
Ki jylla wa ku dooh kiwa dang em ya uni u khñiang toh ha Bihar 1226 ngut, Assam 1178 ngut waka Uttar Pradesh 1120 ngut.
Kiwa chait hapoh ka ri ha i sien wa nyngkong da poi ki 70.38% iwa ku naka 69.80% kiwa em waroh 16,39,599 ngut, kiwa dang em ya uni u khñiang da em ki 27.64% iwa hiar naka 28.21% kiwa em waroh 6,43,948 ngut, wa 1.98% kiwa yap kiwa em 46,091 ngut, iwa da poi 22,68,675 ngut kiwa da yoh COVID-19.
Kiwa da chait da tam ki 9,95,651 ngut ya kiwa dang em ya uni u khñiang iwa ku da 52,091 ngut nadooh ynnin.
