Kiwa da yoh COVID-19 ha India da tam ki 31 lak ngut hadien wa em 61,408 ngut kiwa dang chah ktah ha kini ki 24 kynta hadooh i step ka 24 tarik katkam ka yukheiñ ka Ministry of Health & Family Welfare.
Na kini kiwa dang chah ktah, kiwa chait da em ki 57,649 ngut iwa da pynpoi leh ya kiwa da chait wow tam 23 lak ngut, kiwa dang yap da em ki 836 ngut, katwa kiwa dang em ya uni u khñiang da ku ki da 3,103 ngut.
Ki jylla wa boon dooh kiwa chait toh ha Maharashtra 8157 ngut, Andhra Pradesh 7449, Tamil Nadu 6047 ngut, Karnataka 4996, Uttar Pradesh 4318 wa ha Bihar 3467 ngut.
Ki jylla wa ku dooh kiwa dang em ya uni u khñiang toh ha Maharashtra 2026 ngut, Uttar Pradesh 951 ngut, Karnataka 874 ngut wa ha Odisha 854 ngut.
Kiwa chait hapoh ka ri da em ki 75.27% kiwa ku naka 74.90% kiwa em 23,38,035 ngut, kiwa dang em ya uni u khñiang da em ki 22.88% iwa hiar naka 23.24% kiwa em 7,10,771 ngut, katwa kiwa yap da em ki 1.85% kiwa em 57,542 ngut. Waroh deilang da em 31,06,348 ngut kiwa da dep yoh COVID-19 ha India.
Kiwa dang em ya uni u khñiang da tam ki da 16,27,264 ngut ya kiwa dang em ya uni u khñiang iwa ku da 54,366 ngut nadooh ynnin ka sngi.
