Kiwa da yoh COVID-19 ha India da tam ki 6 lak ngut hadien wa em sa 19,148 ngut kiwa chah ktah ha kini ki 24 kynta katkam wa kheiñ daka Ministry of Health & Family Welfare deilang waka ICMR.
Na kini ki 19,148 ngut, kiwa chait da em ki 11,881 ngut, kiwa dang em ya uni u khñiang da ku ki da 6,833 ngut, kiwa yap da em sa 343 ngut.
Ki jylla wa ku dooh kiwa dang em ya u COVID-19 toh ka Maharashtra kawa ku da 3,096 ngut, ka Karnataka 1,120 ngut, Tamil Nadu 967 ngut waka Delhi 737 ngut.
Ki jylla kiwa da tam 10,000 ngut kiwa yoh, da em ki 13 tylli heiwa du ha Maharashtra da em 1,80,298 ngut kiwa yoh ya uni u khñiang heiwa da chait 93,154 ngut, kiwa dang em ya uni u khñiang da em ki 79,091 ngut wa 8,053 ngut kiwa yap.
Na kiwa yap hapoh ka ri, 45.15% toh kiwa ha Maharashtra, 29.81% kiwa yoh COVID-19 toh kiwa hapoh kani ka jylla.
Ha waroh kawi ka ri, kiwa chait da em ki 59.52% kiwa em 359,860 ngut, kiwa dang em ya uni u khñiang da em ki 37.53% kiwa em 226,947 ngut katwa kiwa yap da em ki 2.95% kiwa em 17,834 ngut. Waroh da em 6,04,641 ngut.
Kiwa chait da tam ki da 1,32,913 ngut ya kiwa dang em ya uni u khñiang iwa ku da 5,048 ngut nadooh ynnin.
