Kiwa dang chah ktah ha u COVID-19 ha India da hiar ki cha ka 7,60,019 ngut iwa duna dooh hadien 74 sngi heiwa ha u 10 Naisan uni u snem kiwa chah ktah da em ki 37,45,237 ngut. Ya ini i hiar kiwa chah ktah da yarap deiwa pteiñ i boon da kiwa chait ya kiwa dang yoh la 37 sngi heiwa kiwa dang yoh leh da neh ki hapoh 1 lak ngut la 12 sngi.
Kiwa dang yoh ha kini ki 24 kynta da em ki 60,753 ngut, kiwa dang chait da em ki 97,743 ngut, kiwa yap 1,647 ngut iwa mut wa kiwa dang em ya uni u khñiang da hiar ki da 38,637 ngut.
Ha kini ki 24 kynta da em leh du 5 tylli ki jylla wa boon da kiwa dang yoh ya kiwa chait wa kynthup ya ka Andaman & Nicobar Islands wa boon da kiwa dang yoh da 4 ngut, Manipur 144 ngut, Meghalaya 210 ngut, Mizoram 84 ngut wa ha West Bengal 618 ngut.
Ynnin ka sngi da leh 19,02,009 tylli ki Test heiwa kiwa chah ktah da em ki 2.98% kawa tip leh kam ka Positivity Rate kawa da neh hapoh 5% la 12 sngi.
Waroh kiwa da chait da em ki 96.16% kiwa em 2,86,78,390 ngut, kiwa dang chah ktah da em ki 2.55% kiwa em 7,60,019 ngut, kiwa yap 1.29% kiwa em 3,85,137 ngut, deilang dapoi 2,98,23,546 ngut kiwa da dep yoh ya uni u khñiang hapoh ka ri.
Heiyatoh wa i e tika hapoh ka ri, da dep wow e la 27,23,88,783 sien heiwa ynnin ka sngi da e 33,00,085 sien.
