Kiwa dang chah ktah ha u COVID-19 ha India da hiar ki hapoh 5% deiwa pteiñ u boon da kiwa chait ya kiwa yoh la 47 sngi kattu. Kiwa dang yoh ha kini ki 24 kynta da em ki 45,576 ngut, kiwa dang chait da em ki 48,493 ngut, kiwa dang yap da em ki 585 ngut iwa mut wa kiwa dang em ya uni u khñiang da hiar ki da 3,502 ngut.
Ki 10 tylli ki jylla kiwa boon dooh kiwa dang chait toh ha Kerala 7,066 ngut, Delhi 6,901 ngut, Maharashtra 6,608 ngut, West Bengal 4,429 ngut, Uttar Pradesh 2,529 ngut, Tamil Nadu 2,311 ngut, Haryana 2,142 ngut, Karnataka 1,947 ngut, Chhattisgarh 1,816 ngut wa ha Rajasthan 1,721 ngut.
Ki 10 tylli ki jylla kiwa boon dooh kiwa dang yoh toh ha Delhi 7,486 ngut, Kerala 6,419 ngut, Maharashtra 5,011 ngut, West Bengal 3,668 ngut, Haryana 2,562 ngut, Uttar Pradesh 2,346 ngut, Rajasthan 2,178 ngut, Chhattisgarh 2,048 ngut, Karnataka 1,791 ngut wa ha Tamil Nadu 1,714 ngut.
Na kiwa dang yap kiwa boon dooh toh ha Delhi 131 ngut wa ha Maharashtra 100 ngut.
Waroh kiwa da chait da em ki 93.58% iwa ku naka 93.42% kiwa em 83,83,602 ngut; kiwa dang em ya uni u khñiang da em ki 4.95% iwa hiar naka 5.01% kiwa em 4,43,303 ngut; 1.47% kiwa da yap kiwa em 1,31,578 ngut, deilang waroh da poi 89,58,483 ngut kiwa da dep yoh ya uni u khñiang hapoh ka ri.
Kiwa chait da tam ki da 79,40,299 ngut iwa ku da 51,955 ngut nadooh ynnin ka sngi.
