Kiwa yoh COVID-19 ha India da pteiñ ki wow hiar deiwa em hapoh 50,000 ngut la ar sngi heiwa ynne ka sngi da em ki hapoh 30,000 ngut, kiwa chait leh da pteiñ ki wow boon iwa da pynhiar ya kiwa chah ktah wow em ki hapoh 1%.
Kiwa dang yoh ha kini ki 24 kynta da em ki 27,409 ngut, kiwa dang chait 82,817 ngut wa 347 ngut kiwa yap iwa mut wa kiwa dang chah ktah da hiar ki da 55,755 ngut.
Ynnin da em du ar tylli ki jylla wa tam da kiwa dang yoh ya kiwa chait kitæ ha Uttarakhand 70 ngut wa ha Lakshadweep 7 ngut. Katwa kiwa boon dooh wa tam da kiwa chait toh ha Kerala 15,946 ngut, Maharashtra 9454 ngut wa ha Tamil Nadu 5748 ngut.
Ynnin ka sngi da leh 12,29,536 tylli ki Test heiwa kiwa chah ktah da em ki 2.23% kawa tip leh kam ka Positivity Rate kawa da hiar na 3.19% ynnin.
Waroh kiwa dang chah ktah da em ki 4,23,127 ngut iwa mut 0.99%, kiwa da chait 4,17,60,458 ngut iwa man 97.82% wa 5,09,358 ngut kiwa yap kiwa em 1.19%.
Heiyatoh wa i e tika hapoh ka ri, da dep wow e la 1,73,42,62,440 sien heiwa ynnin ka sngi da e 44,68,365 sien.
