Hadien wa da sakhi yei pteiñ i ku kiwa chah ktah ha u COVID-19 ha ka jylla wei i sdang dawa yei emkaam ya ka Oxygen neibynta kiwa chah ktah ha kani ka khlam, ynne ka sngi neiliang u Director of Health Services (MI), Dr. Aman War da pyntip u wa ka Oxygen Plant ha Umsawli kawa ye u pynmih hadooh 13 KL ka la’ær daw man ko kawa da pynkhreh nadooh ka 15 Naiynru.
Kani ka Cryogenic Plant da yooluti wow ye ko u pyndap hadooh 1000 tylli ki tadong (Cylinder) ha ka chi sngi.
Da pyntip u leh wa sa kawi ka thaw ha Jengial, Tura daw ye ko u pynmih hadooh 20 KL kani ka la’ær, wei katni dang sah ki kattu katni donhi ki kreh ha kani ka thaw.
U Dr. Aman da kyrmen skem u leh wa deiwa pyndep ya kini ki thaw pynmih la’ær daw ye u pynpoi Oxygen cha Ri-loom Garo, Khasi wa Jaiñtia.
Chooh chooh da pyntip u wa ka Oxygen Plant ha Civil Hospital Shillong kawa da yoh yarap lyngba ka PM-CARES daw krehkaam ko nadooh ka 24 tarik uni u bnai heiwa daw ye ko u chakri ya ki 25 tylli ki pyllong wa thiah sumaar kiwa yoh COVID-19.
Heiyatoh wa ka R.P. Chest Hospital leh kawa da yoh yarap na ka PM-CARES, i kreh ha ka Oxygen Plant daw sdang i mynstep, deiwa pynrap wa ka thaw pynmih Oxygen ha Ganesh Das Hospital u sdang krehkaam ko nadooh mynstep ka sngi.
Heiyatoh wa ha Jowai, Nongpoh wa Tura kiwa yoh lyngba ka UNDP, daw sdang krehkaam ki na ka tayaaw wow wan wei kawi won lyngba ka sorkar jylla won ha Khliehriat, East Jaiñtia Hills District i kreh dang lai i chaphrang.
Da pyntip u leh wa ka sorkar da pynkhreh ko leh ya ki thaw pynmih la’ær ha ki 45 tylli ki Community Health Centre ha kylleiñ ka jylla lada dawa i kaam.
