Ka chnat Directorate of Information and Public Relations deiwa ya krehlang wa ka Health Department ka sorkar Meghalaya da pynman ki ya ka yalang wow pynsñiawthooh ya kiwa thoh khubor hajrong u COVID-19 kawa da pynman ha ka 15 tarik uni u bnai ha Anton Hall, Laitumkhrah. Da wan wow chimbynta nadooh ki Editor, Producer, Journalists, Correspondents na kiwa boon ki laad pathai khubor deilang wa ki sahep ka Health Department wa na ka Directorate of Information and Public Relations.
Hawa e yei klam, ka M. War Nongbri, IAS, Secretary ka Meghalaya, Information and Public Relations Department, da ong ko wa ka sorkar da dep ko wow leh ya kiwa boon ki pynsñiawthooh paidbah wa da leh lyngba ka State COVID-19 Communication Coordination Unit yow e yutip wei wow e sikai ya ki paidbah hajrong kiwa boon ki kaam wa yatoh wa ka khlam COVID-19, katni da khut ya kani ka yalang yow phyllu yumut wa kammon ka sorkar deilang wa kiwa thoh khubor u ye ki u ya krehlang yow pynpoor ya ka khubor wa biang cha ki paidbah.
Da pynsñiaw ko leh yei sñiawngooh yei kreh chitom kiwa thoh khubor ha kini ki por wa em ka khlam COVID-19 nadooh ynnin u snem deiwa paan leh wow pteiñ ya ini i krehlang yow e ya ka yutip wa biang wa tne cha ki paidbah.
Ha kani ka yachemlang da yaklam kammon wow yaleh pyrchah ya i poor ki khubor thok kiwa yatoh wa ka khlam COVID-19 khamtam hajrong i tika.
Ha ki bynta ya phyllu yumut da yaklam hajrong i pynkhreh ya ki thaw sumaar, kammon wow pynsñiawthooh ya ki paidbah, ka yukheiñ wa yatoh wa ka khlam, i daw wa artatien ki bru ya i tika kiwa da pynche da ki Doctor ka Health Department.
Ha kani ka sngi da pynyoo leh deiwa bniah yei long i man ka khlam COVID-19 da ki Doctor na ka Health Department. Kiwi de kiwa klam ha kani ka sngi toh u B. S. Sohliya, MCS, Director of Information and Public Relations, Dr. A. Dkhar, Surgeon Superintendent, Shillong Civil Hospital, Dr. F V Kharshiing, Joint Director DHS MI, Dr. P Manners, Joint Director DHS MCH cum State Immunisation Officer, Dr. B. Decruse, Nodal Officer IEC Covid-19 wa u R. Nongkhlaw, Deputy Director, DIPR, Shillong.
Katkam ka yukheiñ kawa hadooh ka 15 tarik uni u bnai, kiwa chait da em ki 91.29%, kiwa dang chah ktah 7.05% katwa kiwa yap da em ki 1.66% wei ha kini ki 7 sngi wa da lai da em kamwa 396 ngut kiwa yoh thymme ya u khñiang khlam man-ka-sngi.
Nadooh wa sdang ka khlam ha Meghalaya, ha u Naisan, 2021 da man u uwa boon dooh kiwa yoh kiwa em 18,884 ngut kamjooh leh iwa boon dooh kiwa yap kiwa em 420 ngut wei kiwa duna toh ha u Wisu (Mar) 2021 wa em du 105 ngut kiwa yoh wa 2 ngut kiwa yap. Ha uni u Naiynñiaw kiwa da dep wow yoh da em ki 5376 ngut wa 76 ngut kiwa yap hadooh ka 15 tarik katwa ha uni u Naiynru da em 14,190 ngut kiwa yoh wa 253 ngut kiwa yap.
Na ki 3925 ngut kiwa dang chah ktah, 62% toh kiwa em ya ki dak ki chin wa chitom, katwa 38% toh kiwa ym em ki dak ki chin wa chitom.
Na kiwa dang chah ktah kiwa boon dooh toh kiwa em 15-29 snem i rta kiwa em 1369 ngut, pynbood sa ki 30-44 snem kiwa em 1094 ngut, kiwa em 0-14 snem 695 ngut, ki 45-60 snem 674 ngut wa kiwa em 60 snem chaneiñ kiwa em 254 ngut.
Ki District wa heh dooh ka Positivity Rate namo kiwa chah ktah hadien wa dep Test toh ka East Khasi Hills 11.63% wa ka Ri-Bhoi 11.03% katwa kawa duna dooh toh ha East Jaiñtia Hills 3.90%.
Heiyatoh wa i e tika, ki bru paidbah wa em 45 snem chaneiñ da em ki 51% (2,73,164 ngut) kiwa da yoh yei tika chisien katwa kiwa em 18-44 snem i rta da em ki 23% (3,36,214) kiwa da yoh yei tika chisien.
