Kiwa dang yoh COVID-19 ha India da neh ki hapoh 50,000 ngut la 13 sngi khlem sangeh heiwa kiwa dang yoh ha kini ki 24 kynta da em ki 42,766 ngut, kiwa dang chait 45,254 ngut, kiwa dang yap 1,206 ngut iwa mut wa kiwa dang em ya uni u khñiang da hiar ki da 3,694 ngut.
Ha kini ki 24 kynta da em 8 tylli ki jylla wa boon da kiwa dang yoh ya kiwa chait wa kynthup ya ka Aruncachal Pradesh wa tam da kiwa dang yoh da 97 ngut, Chandigarh (01), Chhattisgarh (79), Goa (30), Himachal Pradesh (52), Kerala (2979), Mizoram (418) wa ha Sikkim (33).
Ki jylla wa boon dooh kiwa dang chah ktah toh ka Maharashtra (1,15,494), Kerala (1,13,595), Karnataka (37,929), Tamil Nadu (33,224), Andhra Pradesh (30,300), Odisha (24,141), Assam (23,036), West Bengal (15,690) wa ha Telangana (10,942).
Na ki 19,55,225 tylli ki Test wa da leh ynnin ka sngi, kiwa chah ktah da em ki 2.19% iwa tip leh kam ka Positivity Rate kawa da neh hapoh 3% la 19 sngi.
Heiyatoh wa i e tika, da dep wow e la 37,21,96,268 sien heiwa ynnin ka sngi da e 30,55,802 sien.
Waroh kiwa da chait da em ki 97.20% kiwa em 2,99,33,538 ngut, kiwa dang chah ktah da em ki 1.48% kiwa em 4,55,033 ngut, kiwa yap 1.32% kiwa em 4,07,145 ngut, deilang dapoi 3,07,95,716 ngut kiwa da dep yoh ya uni u khñiang hapoh ka ri.
