Ka Ministry of Health & Family Welfare ka sorkar India da pyntip ko wa ha kini ki 24 kynta itæ hadooh 8 waje i step ka 13 tarik, kiwa dang chah ktah ha u COVID-19 da em ki 11,458 ngut, iwa boon dooh haka chi sngi.
Na kini ki 11,458 ngut, 7,135 ngut toh kiwa dang chait wa 3,937 ngut toh kiwa dang yoh wa 386 ngut kiwa yap.
Waroh kiwa da chait da em ki 154,330 ngut katwa kiwa dang em ya u COVID-19 da em ki 145,779 ngut iwa boon ki wa chait da 8,551 ngut ya kiwa dang em. Kiwa yap da em ki 8,884 ngut. Waroh deilang da em 308,993 ngut.
Ka jylla Maharashtra wa chah ktah dooh hapoh ka ri da em ko 101,141 kiwa da yoh ya u COVID-19 heiwa 49,628 ngut toh kiwa dang em ya uni u khñiang katwa kiwa chait da em ki 47,796 ngut wa 3717 ngut kiwa yap.
Ha Tamil Nadu won da em 18,284 ngut kiwa dang em ya uni u khñiang katwa 22,047 ngut won da chait ki wa 367 ngut kiwa yap iwa da poi waroh 40,698 ngut.
Ha Delhi won da em 22,212 ngut kiwa dang em ya uni u khñiang, 13,398 ngut kiwa da chait wa 1214 ngut kiwa da yap. Waroh da em 36,824 ngut.
Ha Gujarat won da em 5619 ngut kiwa dang em ya uni u khñiang wa 15,493 ngut kiwa da chait wa 1415 ngut kiwa yap. Waroh da em 22,527 ngut.
Kini toh ki 4 tylli ki jylla kiwa da chah ktah dooh hapoh ka ri kiwa da tam 20 hajar ngut kiwa yoh ya u COVID-19.
