Shillong: Ka jylla Meghalaya hadooh i por 4 waje i janmiet ynne ka 20 tarik da ku kiwa dang em ya u COVID-19 cha 413 ngut, wei ynne ka sngi da em 19 ngut kiwa yoh thymme, katwa kiwa chait da em ki 52 ngut.
Katkam wa pyntip u Director of Health Services (MI), u Dr. Aman War, kiwa yoh thymme ynne ka sngi da em ki 16 ngut ha East Khasi Hills, wa kynthup ya 13 ngut ki BSF wa 3 ngut kiwi, 1 wa wan na Khanapra, 1 wa yabi na kiwa wan bia na Bihar kiwa em ha Keating Road wa 1 wa ha Assam Regimental Centre. Ki 3 ngut kiwi toh na West Garo Hills 2 ngut wa South West Garo Hills 1.
Da pyntip u wa na ki 413 ngut kiwa dang em ya u khñiang COVID-19, ha East Khasi Hills da em ki 356 ngut, wei na kini, ki BSF da em 278 ngut, na kiwi ki chnat chipai 14 ngut katwa na ki bru paidbah da em 64 ngut. Ha Ri-Bhoi da em 36 ngut, West Garo Hills 13, East Jaiñtia, South West Garo Hills wa South Garo Hills mar 2 ngut, katwa ha East Garo Hills wa North Garo Hills mar 1.
Hawa kylli, u DHS da pyntip u wa napyrdi kiwa dang em ya u COVID-19, du uwi uwa chitom uwa chah sumaar ha North East Indira Gandhi Regional Institute of Health and Medical Sciences (NEIGRIHMS), tangwa uni ym emkaam u yaka kor Ventilator.
