Ka Mizoram da pteiñ ko wow man ka jylla wa chah ktah dooh na ki jylla ka thaaiñ mihsngi ha kani ka la-ær wa ar ka khlam COVID-19 heiwa ha kini ki ar sngi kiwa dang yoh da em ki palat 1000 ngut iwa ha ka 28 tarik da em ki 1846 ngut iwa boon dooh ha ka chi sngi katwa ynne ka 29 tarik da em ki 1380 ngut.
Kiwa dang chah ktah da em ki 16,208 ngut iwa da pynman ya ka Mizoram kam ka jylla wa soo wa boon dooh kiwa dang chah ktah hadien ka Kerala, Maharashtra wa Tamil Nadu.
Waroh kiwa da dep yoh COVID-19 ha Mizoram da em ki 91,919 ngut (45,540 ngut ki chynrang wa 46,379 ngut ki kynthai), kiwa da chait da em ki 75,405 ngut wa 306 ngut kiwa yap.
Na kiwa dang chah ktah kiwa boon dooh toh hapoh ka Aizawl District kiwa em 11,409 ngut iwa pynbood sa ka Siaha kiwa em 1106 ngut.
Hapoh ka ri India won kiwa dang yoh da neh ki hapoh 20,000 ngut la ar sngi heiwa kiwa dang yoh ha kini ki 24 kynta da em ki 18,870 ngut, kiwa dang chait 28,178 ngut, kiwa yap 378 ngut iwa mut wa kiwa dang chah ktah da hiar ki da 9,686 ngut.
Waroh kiwa dang chah ktah da em ki 2,82,520 ngut iwa duna dooh ha ki 194 sngi katwa kiwa chait da ku ki cha ka 97.83% iwa heh dooh nadooh u March 2020 kiwa da em 3,29,86,180 ngut.
Kiwa chah ktah na kiwa chah Test da em ki 1.25% kawa tip leh kam ka Positivity Rate kawa da neh hapoh 3% la 30 sngi.
Heiyatoh wa i e tika da dep wow e la 87,66,63,490 sien heiwa ynnin ka sngi da e 54,13,332 sien.
