Hadien wa ynnin ka sngi hiar kiwa yoh COVID-19 ha India hapoh 2 lak ngut, ynne ka sngi da ku biang deiwa em 2,08,921 ngut kiwa dang yoh, kiwa dang chait da em ki 2,95,955 ngut, kiwa dang yap da em ki 4,157 ngut iwa mut wa kiwa dang em ya uni u khñiang da hiar ki da 91,191 ngut.
Kiwa chait la 13 sngi khlem sangeh da boon ki ya kiwa dang yoh wei kiwa dang yoh la 10 sngi khlem sangeh da em ki hapoh 3 lak ngut.
Ha kini ki 24 kynta da pynman leh ya iwa boon dooh ki Test ha ka chi sngi iwa 22,17,320 tylli wei na kiwa chah Test da em ki 9.42% kiwa yoh namo ka Positivity Rate kawa da neh hapoh 10% la ar sngi kattu.
Na waroh ki jylla, da em 10 tylli wa boon da kiwa dang yoh ya kiwa dang chait ha kini ki 24 kynta hiewa na kini, 7 tylli toh ki jylla ka thaaiñ Northeast wa kynthup ya ka Arunachal Pradesh wa tam kiwa dang yoh da 196 ngut, Assam 892 ngut, Ladakh 98 ngut, Lakshadweep 158 ngut, Manipur 341 ngut, Meghalaya 183 ngut, Mizoram 174 ngut, Nagaland 92 ngut, Sikkim 186 ngut wa ha Tamil Nadu 5072 ngut.
Ki 10 tylli ki jylla wa boon dooh kiwa dang em ya uni u khñiang toh ha Karnataka 4,24,402 ngut, Maharashtra 3,17,038 ngut, Tamil Nadu 3,06,652 ngut, Kerala 2,55,788 ngut, Andhra Pradesh 1,98,023 ngut, West Bengal 1,26,376 ngut, Odisha 98,838 ngut, Rajasthan 87,391 ngut, Uttar Pradesh 69,828 ngut wa ha Gujarat 62,506 ngut.
Waroh kiwa da chait da em ki 89.66% kiwa em 2,43,50,816 ngut, kiwa dang chah ktah da em ki 9.19% kiwa em 24,95,591 ngut, kiwa yap 1.15% kiwa em 3,11,388 ngut, deilang dapoi 2,71,57,795 ngut kiwa da dep yoh ya uni u khñiang hapoh ka ri.
Heiyatoh wa i e dawai tika hapoh ka ri da tam i ya 20 klur sien deiwa dep wow e la 20,06,62,456 sien.
