U montri khynnah ka sorkar pyrdi wa pait ya ka chnat Chemicals and Fertilizers, u Mansukh Mandaviya da pyntip u wa da pynboon ya i chna ya i dawai Remdesivir da chiphaw chah na ka 33,000 klong (Vials) ha ka chi sngi ha ka 11 Naitung (April) 2021 cha ka 3,50,000 klong chi sngi katni.
Neiliang u Mansukh da pyntip u leh wa da pynboon ya ki thaw (Plants) wa pynmih ya ini i dawai Remdesivir na ka 20 cha ka 60 tylli hapoh chi bnai, deiwa pynrap leh wa i pynmih ya i Remdesivir da boon i bar yeiwa emkaam.
Chooh chooh da pyntip u wa ka sorkar pyrdi da rai ko wow sangeh noh chwa u e ya ini u dawai cha ki jylla deiwa phah ya ka National Pharmaceuticals Pricing Agency wa CDSCO wow sylli bniah yei em wei dap ini i dawai hapoh ka ri.
Ka sorkar pyrdi da rai ko leh wow thied 50 lak klong i Remdesivir khnang wow pynyang chwa (Strategic Stock) lada jia wa emkaam syndet syndet wei emkaam jhan ya ini i dawai.
