Ynnin ka 17 tarik wa ynne ka sngi, 6 ngut kiwa yoh ya u khñiang COVID-19 ha Assam da yoh ki wow mih Hospital.
Ya ini da pyntip da u montri ka chnat i chait i khiah ka Assam u Himanta Biswa Sarma heiwa ynnin da em 4 ngut kiwa da dep Test la soo sien ym em de chem wa em ki ya u khñiang COVID-19 kiwa chah sumaar ha Golaghat Civil Hospital.
Kiwa da chait toh u Haidor Ali, Wahida Begum, Yakub Ali wa u Ruma Begum kiwa da phah won yaki wow chong ki khop ha yung (Home Quarantine) 14 sngi.
Ynne won da yoh wow mih Hospital sa ar ngut kiwa da chait kiwa chah sumaar ha MMCH kiwa tip pyrtuid kam u Md Arshad wa u Md Rizuwan heiwa ya kini leh da dep Test soo sien wei ym em de em ki ya u khñiang COVID-19.
Wa kini waroh kiwa da chait da em ki 11 ngut ha Assam.
U Sarma da pyntip u leh wa u DC wa u SP ka Marigaon District da dep Test yaki wei ym em ki ya u COVID-19.
Chooh chooh da pyntip u wa ka Tezpur Medical College leh da tipmit yaka kam ka thaw wow Test ya u COVID-19 kiwa kattu da em 6 tylli hapoh Assam.
Discussion about this post