Ki san tylli ki seiñbhalang kiwa da pynbna yakhih kawa tip kam ka Save Hynniewtrep Movement (SHM) da pyntip ki ynne ka sngi ya ka sorkar wow pynjoor yakhih lada ka sorkar ym pynmankaam ko ya ki 9 tylli ki phang dawa, wei ki yakhih u man ki syndet syndet, ya ini ki seiñbhalang da pynsñiaw ki hakhmat u Montri ki Kaam Pohyung ka jylla, u Lahkmen Rymbui.
Hadien wa ki seiñbhalang kiwa da pynbna ya ka Save Hynniewtrep Movement ynne i step da lai tia ki cha Secretariat wot hapyrdi i pynkrehkaam ya ka Section 144 CrPC ha waroh kawi ka Shillong, wei neiliang ki pulit wa ki Magistrate da khang luti noh ki ya ki seiñbhalang hajan ka yung krehkaam u Superintendent of Police, IGP.
Ini i tia ki seiñbhalang toh hadien i tyrwa u Symbood Montri Rangbah wa ka dwar yong ka sorkar wai ko wow yaklam hajrong kiwon kiwon ki mat. Hadien wa tia ki cha Secretariat wei neidaw wym em u Montri Rangbah wa u Symbood Montri Rangbah, ki seiñbhalang da yachem noh ki ya u Lahkmen Rymbui.
Neiliang u Roykupar Synrem uwa man u General Secretary ka HYC, da pyntip u wa dadep klam che ha u Montri, wei neiliang u Lahkmen Rymbui da ong u wa ymye u wow chim rai hajrong kini ki mat tangwa daw pyntip u yei dawa ki seiñbhalang cha ka sorkar.
