Ynne ka sngi ka yung krehkaam ka District Legal Service Authority, West Jaiñtia Hills District, Jowai chirup i yakrehlang waka District Labour Office, West Jaiñtia Hills da pynman ki yei kynmoo warom yaka “World Day Against Child Labour” ha All Saints CNI, School, Ladthadlaboh Jowai.
Haka yalang wa pynlai da u R. Lyngdoh, Legal Aid Counsel, ka B. Toi Labour Inspector, West Jaiñtia Hills da klam ko hajrong ka phang “Child and Adolescent Labour (Prohibited and Regulation) Act 1986, kawa man ka aiñ wa khang pyrchah yaki khynnah u khih u kreh heiwa ki khynnah wa hapoh i rta 14 snem dang toh u yoh ki yei hok puræ puthi.
Ka Mandakini Nongtdu Coordinator Childline, hawa pynche hajrong i rukom krehkam ka Childline, da kyntu haroh ko wow e yutip cha ka yung krehkaam yong ki lada em kiwon kiwon ki khynnah wa chah lehbeiñ la ha yung ha sem, haki bru, ne haka imlang sahlang, najrong wow e yutip leh lada chem ya ki khynnah wa wiar.
U B.M. Lamare Legal cum Probation Officer, District Child Protection Unit, WJHD da e u yei klam hajrong ka “Child Protection Issue” deiwa batai heiyatoh ka aiñ wow yada yaki khynnah wa hapoh 18 snem i rta kawa tip kam ka Juvenile Justice Act.
Da pynsñiaw haroh u heiyatoh wa i rukom krehkaam yong ki nadooh wow e Counselling yaki khynnah, neitæ i yarap pynyoh yei hok ki khynnah wa kiwi.
Hajrong ka POSCO Act, ka aiñ wow yada yaki khynnah wa chah thombor, kyntu haroh u yaki khynnah skur wow kiar i yalok khynroo hapoh 18 snem i rta ya ki kynthai, 21 snem ya ki chynrang, neibhah wa kani ka aiñ pynkhor bha ko ya kiwa leh pyrchah.
Heijooh i por kyntu u ya ki khynnah skur wow khana ya ki bei ki pa chwa wow leh iwon iwon khnang yow lait nei jia wa sñiawsih.
Heiyatoh wa i kaamram ki Para Legal Volunteers, u H. Suiam da khana u wa i kaam yong ki toh u e yutip cha ki paidbah heiyatoh wa i hok longbru manbru yong kitu wa tyngkhooh waka aiñ, wym du hei yatoh waka Child Labour.
Kyntu u leh yaki paidbah u wan yachem waki Para Legal Volunteer heiyatoh i eh i khoo wa chem ki, lada toh i wow e yarap heiyatoh i chait i khiah, i chah thombor ki khynnah, lane cha ki chnat pulit wa kiwi de ki bor aiñ.
Hawa kut ka yalang da yoh i klam e khublei na u Principal ka All Saints CNI School Ladthadlaboh, wei sñiawkmen u leh wa kani ka yalang man ko kawa e myntoi bha yaki khynnah skur.
